ढाका । बंगलादेशका खतरनाक जल्लाद मानिने साहजाहान भुइयानको ७४ वर्षको उमेरमा सोमबार मृत्यु भएको छ । उनले थुप्रै ‘सिरियल किलर’ र राजनीतिज्ञलाई मृत्युदण्डको सजाय कार्यान्वयन गर्ने क्रममा झुन्ड्याएका  थिए ।

छातीमा दुखाइपछि उनलाई सोमबार राजधानी ढाकास्थित अस्पतालमा भर्ना गरिएको थियो । त्यहीँ उपचारका क्रममा उनको मृत्यु भएको जनाइएको छ ।

उनले कम्तीमा २६ जनालाई मृत्युदण्डका क्रममा झुन्ड्याएको बताइने गरिन्छ । कतिपयले उक्त संख्या ६० हुन सक्ने जनाएका छन् ।

पूर्वक्रान्तिकारी उनी डकैती र हत्या अभियोगमा ४२ वर्षको जेलजीवन तोकिएकामा १० वर्षअघि नै छुटेका थिए ।

उनको हातबाट मारिनेमा देशका संस्थापक नेता मुजीबुर रहमानको हत्या गर्ने सैनिक अधिकारीहरू, राजनीतिज्ञ अली अहसनर मुजाहिड र सलहुद्धिन क्वादर चौधरी, सिरियल किलर एर्शाद सिक्दरलगायत व्यक्ति थिए ।

उनले आफ्नो कामको प्रतिरक्षा गर्दै भन्ने गरेका थिए, “यदि, मैले नझुन्ड्याएको भए अरू कसैले त्यो काम गर्थ्यो ।”

उनीबारे लेखिएको एउटा पुस्तक यो वर्षको सुरुमा सार्वजनिक गरिएको थियो । त्यसले निकै चर्चा पाएको थियो ।

उनले आफूभन्दा ५० वर्ष कान्छी महिलासँग विवाह गरेका थिए । त्यसले उनी कानुनी झमेलामा पनि परेका ढाका ट्रिब्युनले जनाएको छ । बीबीसीबाट ।