काठमाडौं । नेपाल व्यवस्थापन संघका सदस्य तथा प्रभु बैंकका प्रमुख कार्यकारी अधिकृत (सीईओ) अशोक शेरचनले अहिले अर्थतन्त्रका सूचक राम्रो अवस्थामा रहेको बताउँदै आत्तिनुपर्ने अवस्था नभएको जनाएका छन् । 

सोमबार नेपाल व्यवस्थापन संघले आयोजना गरेको आगामी वर्षको मौद्रिक नीतिको छलफल कार्यक्रममा शेरचनले उद्योग व्यवसाय अहिलेको अवस्थामा संकटपूर्ण नभएको बताएका हुन् । 

विदेशी मुद्राको सञ्चितिले साढे १२ महिनाको वस्तु तथा सेवा आयात गर्न पुग्ने भन्दै अहिले अर्थतन्त्रको स्थिति चिन्ता गरिहाल्नुपर्ने नभएको बताए । 

“वैशाख मसान्तमा कुल विदेशी विनिमय सञ्चिति १९ खर्बभन्दा बढी पुगेको छ । यो सञ्चितिले साढे १२ महिनाका वस्तु तथा सेवा आयात गर्न पुग्छ,” उनले भने, “केही समय अर्थतन्त्रमा आएको शिथिलताले सबै क्षेत्रलाई छोएको हो । तर, अहिले हाम्रो उद्योग व्यवसायलाई संकटपूर्ण भनिरहने स्थिति देख्दिन ।” 

बैंकमा डिपोजिटको साइज ६२ खर्बमाथि रहेको पनि उनले जानकारी दिए । 

त्यस्तै लोन ५१ खर्बभन्दा बढी गएको र कर्जा तथा निक्षेप अनुपात (सीडी रेसियो) ८० प्रतिशतभन्दा कम हुनुले पनि अर्थतन्त्र दबाबमा नरहेको संकेत भएको शेरचनको भनाइ छ । अहिले नै अत्तालिनुपर्ने अवस्था नरहेको पनि उनले बताए । 

आर्थिक शिथिलतामा पनि अर्थतन्त्रलाई बिग्रिन नदिइएको उनले बताए ।  आर्थिक गतिविधि बढाउन व्यवसायिक जगतले आत्मविश्वास र इच्छाशक्ति बढाउनुपर्ने धारणा राखेका थिए ।

“कोभिडपछि अर्थतन्त्रमा केही समस्या देखा परे । तर, पछिल्लो समय सबै कुराहरू सामान्य रूपमा चलिरहेको जस्तो देखिन्छ,” उनले भने, “यदी हामी सस्टेन हुने हो भने आर्थिक क्रियाकलाप बढाउनै पर्छ । अहिलेकै गतिमा बस्यौँ भने हामी अगाडि बढ्न सक्दैनौं ।”