काठमाडौं । अर्थमन्त्री वर्षमान पुनले धितोपत्र बोर्डको अध्यक्ष व्यावसायिक रूपमा दक्ष व्यक्ति नियुक्त हुने बताएका छन् । सोमबार प्रतिनिधिसभाको बैठकमा सांसदहरूले उठाएका प्रश्नको जवाफ दिँदै मन्त्री पुनले सिफारिस समितिले सिफारिस गरेका मध्ये दक्ष व्यक्तिलाई बोर्डको अध्यक्ष नियुक्त गर्ने बताएका हुन् ।

अहिले बाहिर समाचारमा आएका कुराहरू जस्तो ठूला नेताले नियुक्तिमा अवरोध नगरेको उनको भनाइ छ । तर, अन्तर्वार्ता र व्यावसायिक प्रस्तुतीकरणमा सर्टलिस्टमा परेकामध्ये दुईजना मात्र उपस्थित भएकाले अब कसरी अगाडि बढ्ने भनेर सरकारका कानुनी सल्लाहकार महान्याधिवक्ताको कार्यालयमा रायका लागि पठाइएको पनि मन्त्री पुनले  जानकारी गराए ।

“मिडियामा विभिन्न किसिमका स्वार्थ समूहका कुराहरू आएका छन्, कुनै नेता विशेषले दबाब दिएका कुराहरू आएका छन् । यो कुरा सत्य हैन,” उनले भने, “यसमा व्यावासायिक रूपले दक्ष मान्छे यसको अध्यक्ष चयन हुन्छ भन्ने मेरो विश्वास छ ।”

नेपाली कांग्रेसका सांसद रामहरि खतिवडाले धितोपत्र बोर्डको अध्यक्षको रस्साकस्सीमा २०० करोड रुपैयाँ बोकेर हिँडेको र मन्त्रीहरूले नै यसमा चासो देखाएको कुरा बजारमा आएको भनेर स्पष्ट पार्न प्रश्न गरेका थिए ।