वासिंटन । अमेरिकामा काम गरिरहेका नेपालसहित पाँच देशका नागरिकलाई दिएको वर्क पर्मिटको म्याद आउँदो मार्च ९, २०२५ सम्मलाई विस्तार गर्न अनुमति दिएको छ । यूएस सिटिजनसिप एन्ड इमिग्रेसन सर्भिस (यूएससीआईएस)ले टेम्पोररी प्रोटेक्टेड स्ट्याटस (टीपीएस)अन्तर्गत काम गरिरहेकालाई अनुमति दिएको हो । 

ती पाँच राष्ट्रमा नेपाल, एल्साल्भाडोर, निकारागुवा, होन्डुरस र सुडान हुन् । सो सुविधाबाट करिब तीन लाख मानिस लाभान्वित हुने यूएससीआईएसले जनाएको छ । 

सशस्त्र द्वन्द्व, प्राकृतिक विपत्ति, महामारी र असाधारण अवस्थामा परेका मानिसलाई अमेरिकामा बस्न र काम गर्ने सुविधाका लागि त्यहाँ टीपीएसको सुविधा दिइएको हो । 

यसअघि डोनाल्ड ट्रम्पको सरकारको पालामा सो सुविधा कटौती गर्ने तयारी गरिएको थियो । तर, त्यतिबेला सम्भव भएको थिएन । पछिल्लो पटकको सूचनाअनुसार अब उनीहरूले मार्च ९, २०२५ सम्म अमेरिकामा काम गर्न र बस्न मिल्नेछ ।

सो सुविधाका लागि रजिस्ट्रेसन गर्न एउटा फर्म भर्नुपर्ने  यूएससीआईएसद्वारा जारी सूचनामा जनाइएको छ । त्यसका लागि नेपाललाई जुन २४, २०२५, एल्साल्भाडोरलाई मार्च ९, २०२५, होन्डुरसलाई जुलाई ५, २०२५, निकारागुवालाई जुलाई ५, २०२५ र सुडानलाई अप्रिल १९, २०२५ को म्याद तोकिएको छ । 

सो सुविधा २०७२ को भूकम्पपछि ९ हजारभन्दा बढी नेपालीले  अमेरिकामा लिइरहेको बताइएको छ ।