काठमाडौं । डेनमार्कले ग्रिनल्यान्ड अमेरिकालाई कुनै पनि हालतमा नदिने बताएको छ । डेनिस प्रधानमन्त्री मेटे फ्रेडरिक्सनले आर्कटिक टापु ग्रिनल्यान्डको आधिकारिक भ्रमणका बेला यो घोषणा गरेकी बीबीसीले जनाएको छ ।

अमेरिकी राष्ट्रपति डोनाल्ड ट्रम्पले ग्रिनल्यान्ड कब्जा गर्ने भनेर दिने गरेको बारम्बारको धम्कीको जवाफ दिँदै प्रधानमन्त्री फ्रेडरिक्सनले अमेरिकाले उठाएको सुरक्षा विषयमा ऊसँग समन्वय गर्न तयार भएको बर्ता । तर, ग्रिनल्यान्डको सम्प्रभूताको विषयमा सम्झौत नहुने बताइन् ।

“तपाईंले अरू देशलाई कब्जा गर्न सक्नुहुन्न,” अमेरिकी राष्ट्रपतिलाई स्पष्ट शब्दमा भनिन् ।

डेनिस प्रधानमन्त्री फ्रेडरिक्सन, ग्रिनल्यान्डका प्रधानमन्त्री जेन्स–फ्रेडरिक निल्सन र पूर्वप्रधानमन्त्री म्युट एगेडे बिहीबार एकै स्थानमा उपस्थित भएर सांकेतिकरूपमा अमेरिकी धम्कीको विरोधमा एक ठाउँमा रहेको सन्देश दिएका थिए । 

डेनिस प्रधानमन्त्री फ्रेडरिक्सनको तीन दिने ग्रिनल्यान्ड भ्रमण, अमेरिकी उपराष्ट्रपति जेडी भान्सको नेतृत्वमा गत हप्ता भएको विवादास्पद अमेरिकी प्रतिनिधिमण्डलको भ्रमणलगत्तै भएको हो । 

जेडी भान्सको उक्त भ्रमणको अवधीमा ग्रिनल्यान्ड र डेनमार्क दुवैले आलोचना झेल्नु परेको थियो ।