काठमाडौं । कानुन, न्याय तथा संसदीय मामिला मन्त्री पदम गिरीले संघीय संसद् सचिवालयका कर्मचारीको माग एक दुई दिनमै सम्बोधन गर्ने जानकारी दिएका छन् । 

संघीय संसद् सचिवालयका कर्मचारीहरूको माग सम्बोधनका लागि तीन सदस्यीय समिति गठन भएको छ । मन्त्री गिरीकै संयोजकत्वमा संसद्का महासचिव पद्यप्रसाद पाण्डेय र अर्थसचिव मधुकुमार मरासिनी रहेको समिति गठन भएको हो । 

समिति संयोजक समेत रहेका मन्त्री गिरीले आज भोलिमै यथोचित मागहरू वार्ताबाट सम्बोधन गर्ने प्रतिबद्धता जनाएका हुन् । आइतबार संसद् भवनमा सञ्चारकर्मीसँग कुरा गर्दै उनले सो बताएका हुन् । 

“सम्माननीय प्रधानमन्त्रीज्यूको कार्यकक्षमा सम्माननीय सभामुखज्यू, सम्माननीय राष्ट्रियसभाको अध्यक्षज्यू, अर्थमन्त्रीसहित हामी बैठकमा बस्यौँ । संघीय संसदका कर्मचारीहरुले जुन माग उठाएर सेवा सुविधाको विषयलाई लिएर आन्दोलन गर्नुभएको छ । उहाँहरूको मागलाई सम्बोधन गरेर संसद्लाई पनि सुचारु गरेर लैजान सन्दर्भमा मैले संयोजन गर्नेगरी संयोजन समिति बनेको छ । त्यसले आजबाट काम सुरु गर्छ । आज भोलिमै यो विषय टुंग्याउँछौँ । माग सुन्छौँ र माग सम्बोधन गर्न के सकिन्छ छलफल गरी यथोचित सम्बोधन हुनेछ,” मन्त्री गिरीले भने ।