काठमाडौं । काठमाडौं महानगरपालिकाका प्रमुख बालेन्द्र शाह (बालेन)ले ठूला सहरकेन्द्रित बसाइँसराइले भविष्यमा पर्नसक्ने असरको व्यवस्थापनका लागि अहिले नै सचेत हुनुपर्ने बताएका छन् ।  

“ठूला सहरकेन्द्रित बसाइँसराइको क्रमले भविष्यमा बढ्ने चाप व्यवस्थापन गर्न अहिलेदेखि नै नीति र संयन्त्र बनाउनु पर्छ । भौगोलिक, सामाजिक, आर्थिकजस्ता कारणले फरक–फरक ठाउँका सहरको समस्या फरक हुन सक्छन्,” मेट्रोपोलिस निर्देशक समितिको बैठकबाट फर्किएपछि उनले भने, “तर केही साझा कार्यक्रम सञ्चालन हुन सक्छन् । बैठकमा यसका नीतिगत पक्षमा छलफल भयो ।” 

मेयर बालेन मेट्रोपोलिस निर्देशक समितिको बैठकमा भाग लिएर आज स्वदेश फर्किएका हुन् । बैठक साओ पाउलोमा असार ५ र ६ गते भएको थियो । 

मेयर बालेन मेट्रोपोलिस निर्देशक बोर्डको सदस्य हुन् । मेट्रोपोलिस विश्वका ठूला १५० भन्दा धेरै महानगरको आवद्धता रहेका अन्तर्राष्ट्रिय संस्था हो ।