काठमाडौं । अख्तियार दुरुपयोग अनुसन्धान आयोगले संसदीय समितिलाई ‘चित्त नबुझ्ने’ प्रगति विवरण पठाएको छ । प्रतिनिधिसभा अन्तर्गतको सार्वजनिक लेखा समितिले ‘भ्रष्टाचार तथा राजस्व हिनामिनामा अख्तियार दुरुपयोग’ भएको विषयमा अनुसन्धान गर्न आयोगलाई निर्देशन दिने गरेको छ । तर, अख्तियारले अनुसन्धानमा भएको प्रगतिबारे समितिलाई जानकारी नै दिने गरेको छैन ।

०७६ सालमा तत्कालीन सञ्चारमन्त्री गोकुलप्रसाद बास्कोटामाथि सेक्युरिटी प्रिन्टिङ प्रेस खरिद सम्बन्धमा ७० करोड कमिसन मागेको आरोप लागेको थियो । आरोपपछि उनले पदबाट राजीनामा दिएका थिए ।

यस प्रकरणमा मुछिएका तत्कालीन कार्यकारी निर्देशक विकल पौडेललाई विशेष अदालतले दोषी ठहर गरेर सजाय सुनाइसकेको छ । अख्तियारले यस प्रकरणमा अझै अनुसन्धान भइरहेको जानकारी लेखा समितिलाई पठाएको छ । 

• लेखा समितिका सदस्यले भने– अटेरी अख्तियार ! हामीलाई टेरेन 

"जतिपटक प्रगति विवरण माग्दा पनि अनुसन्धान भइरहेको झारो टार्ने जवाफ आउने गरेको छ । फेरि चित्त बुझेन, थप विवरण पठाउने भनी लेख्नबाहेक अरू के उपाय छ र !,” एक सदस्यले भने ।

अख्तियारलाई लेखा समितिले टेरामक्स प्रकरणमा अनुसन्धान गर्न र प्रत्येक महिनाको प्रगति विवरण बुझाउन भनेको थियो । ०८० पुस ११ गते बसेको समितिको बैठकले टेरामक्स खरिद प्रक्रियामा भएको भनिएको अनियमितताबारै अख्तियारलाई छानबिन गर्न निर्देशन दियो । जसको प्रगति विवरण हरेक ३० दिनमा पठाउन भनिएको थियो ।

तर, अख्तियारले पाँच महिनापछि मात्र विवरण पठाएको छ । विवरण अनुसार गत वर्ष साउनबाट सुरु भएको अनुसन्धान अझै सकिएको छैन ।

समितिका सभापति ऋषिकेश पोखरेलका अनुसार, अख्तियारले जेठ २५ गते प्रगति विवरण बुझाएको हो ।

“अख्तियारले हामीलाई मागेको विवरण पठाएको छ । टेरामक्स प्रकरणमा अनुसन्धान भइरहेको जानकारी गराएको छ,” उनले भने ।

लेखा समितिले टेरामक्स र सेक्युरिटी प्रिन्टिङबाहेक अख्तियारलाई अन्य १९ वटा विषयमा पनि छानबिन गर्न भनेको थियो । ती विषयको प्रगति विवरण पनि अख्तियारले पठाएको छ ।

“२१ विषयको जानकारी हामीलाई पठाइएको छ,” पोखरेलले बाह्रखरीसँग भने । 

कुन विषयको कति भयो प्रगति भयो ?