रियाद । साउदी अरेबियामा हजका निम्ति गएका मानिसको ठूलो संख्यामा मृत्यु भएको छ । सयौँ मानिस बिरामी परेका छन् । त्यहाँको असुविधा र अव्यवस्थाका कारण साउदी सरकारको आलोचना गरिएको छ ।

औपचारिक रूपमा विभिन्न देशले कुल ५६२ जनाको मृत्यु भएको पुष्टि गरेका छन् । एएफपीले जनाएअनुसार, मृत्यु हुनेको संख्या एक हजारभन्दा बढी पुगिसकेको छ । बिरामी हुनेको संख्या दुई हजार ७६४ पुगेको साउदी सरकारले जनाएको छ ।

सबैभन्दा बढी इजिप्टका ३२३ जनाको मृत्यु भएको छ । यस्तै, ३५ पाकिस्तानी, ओमानका ४१, ६० जोर्डनी, ट्युनिसियाका ३५, इन्डोनेसियाका १३६ मानिसको मृत्यु भएको जनाइएको छ ।

जोर्डनले आफ्नो देशका ८४ नागरिक बेपत्ता भएको जनाएको छ । हज सुरु हुनुअघि नै केही यात्रीको मृत्यु भएको अन्तर्राष्ट्रिय सञ्चारमाध्यममा उल्लेख छ ।

हज गर्ने स्थान भारतीय, पाकिस्तानी र बंगलादेशीका निम्ति असुविधायुक्त र अरबी मुलुकका हकमा सुविधायुक्त भएको केही हजयात्रीले आरोप लगाएका छन् । त्यहाँको सेवा सुविधा जनावरलाई गरिने खालको भन्दा खराब र पानीको अभाव भएको हजयात्रीले आरोप लगाएका छन् ।

त्यहाँ ज्यान गुमाउने हजयात्रीका शव उनीहरूका मुलुकमा लैजान नमिल्ने व्यवस्था छ । त्यहीँ अन्तिम संस्कार गरिने जनाइएको छ । उनीहरूले आफ्नो मृत्यु भएमा दाहसंस्कार त्यहीँ गर्ने पहिल्यै फाराम भरेका कारण परिवारले दाबी गर्न नमिल्ने व्यवस्था छ । बीबीसी हिन्दीबाट ।