काठमाडौं । ओपनर फिल साल्टको अर्धशतकप्रेरित इंग्ल्यान्डले आईसीसी ट्वान्टी–२० विश्वकपको सुपर–८ को आफ्नो पहिलो खेलमा वेस्ट इन्डिजविरुद्ध आठ विकेटको सहज जित निकालेको छ ।

बिहीबार डारेन सामी राष्ट्रिय क्रिकेट रंगशालामा वेस्ट इन्डिजले प्रस्तुत गरेको १८१ रनको लक्ष्य इंग्ल्यान्डले १५ बल बाँकी छँदै दुई विकेट गुमाएर पूरा गर्‍यो ।

इंग्ल्यान्डको जितमा ओपनर फिल साल्टले ८७ रन बनाए । साल्टले ४७ बलमा सात चौका र पाँच छक्का प्रहार गरे । जोनी बेरेस्टोले २६ बलमा पाँच चौका र दुई छक्कासहित ४८ रन थपे । ८४–२ को अवस्थाबाट यी दुईले ९७ रनको अविजित साझेदारी गर्दै इंग्ल्यान्डलाई जितसम्म डोर्‍याएका हुन् ।

कप्तान जस बटलरले २५ र मोइन अलीले १३ रन जोडे ।

वेस्ट इन्डिजका आन्द्रे रसेल र रोस्टन चेजले समान एक विकेट लिए ।

त्यसअघि, टस हारेर ब्याटिङमा उत्रिएको वेस्ट इन्डिजले निर्धारित २० ओभरमा चार विकेट गुमाएर १८० रन बनाएको थियो ।

वेस्ट इन्डिजका जोन्सन चार्ल्सले ३८ रनको योगदान गरे । निकालेस पुरन र कपतान रोभमन पावेलले समान ३६ रन जोडे । सेर्फाने रथरफोर्डले २८ र ब्रान्डन किंगले २३ रन बनाए ।

इंग्ल्यान्डका जोफ्रा आर्चर, आदिल राशिद, मोइन अली र लियम लिभिङ्स्टोनले समान एक विकेट लिए ।

प्रतियोगितामा वेस्ट इन्डिज समूह ‘सी’को शीर्ष र इंग्ल्यान्ड समूह ‘बी’को दोस्रो स्थानमा रहँदै सुपर–८ मा आएका हुन् ।