पोखरा । गण्डकी प्रदेशसभा सचिवालयले २५ हजार रुपैयाँ पुरस्कारसहित गण्डकीको लोगो बनाउन सूचना जारी गर्‍यो । सूचनापछि प्रदेशसभाकै कर्मचारीले बनाएको लोगोलाई नियमावलीमा राखियो ।

त्यसपछि नै प्रदेशसभा सदस्यहरूले उक्त लोगो प्रयोग गर्न थाले । पहिलो कार्यकालमा बनाइएको उक्त लोगो प्लास्टिकको थियो । त्यतिबेला प्रतिलोगोको मूल्य १९५ रुपैयाँ थियो ।

त्यही लोगोलाई पछि चाँदीको बेस राखेर चौघेरामा सुनको लेपन लगाइयो । त्यस्तो लोगो चीनबाट बनाएर ल्याइएको थियो । चाँदी र सुनको लेपन जोडेपछि लोगोको मूल्य ३३ गुणा महँगो हुन पुग्यो । १९५ रुपैयाँको प्लास्टिकको लोगोमा चाँदी र सुन जोड्दा त्यसको मूल्य ६ हजार ७५० रुपैयाँ पर्न गयो ।

नेपालले विसं ०७७ जेठमा कालापानी, लिम्पियाधुरा र लिपुलेकसमेत देखिने गरी नेपालको आधिकारिक नक्सा जारी गर्‍यो । त्यसपछि गण्डकीको लोगो पुन: सच्याइयो र लोगोमा नेपालको चुच्चे नक्सा समेटियो ।

पहिलो कार्यकालमा प्लास्टिकको लोगो लगाएका प्रदेशसभा सदस्यहरूले कार्यकालको अन्त्यतिर चाहिँ चुच्चे नक्सासहितको सुन जडित लोगो लगाउन पाए ।

दोस्रो कार्यकालमा भने गण्डकी प्रदेशसभाको नियमावली नै नयाँ बनाइयो । नियमावली संशोधनको क्रममा गठित उपसमितिले पुरानो लोगो भद्दा भएको भएको भन्दै नियमावलीमा नयाँ लोगो राख्यो ।

०८० असारमा पारित नयाँ नियमावलीमा नयाँ लोगो समेटिए पनि प्रदेशसभा सदस्यहरूले पाएका थिएनन् । उनीहरूलाई प्रदेशसभा सचिवालयले चुच्चे नक्सासहितको पुरानै लोगो दिएको थियो ।

आर्थिक वर्षको अन्त्यतिर भने प्रदेशसभा सदस्यहरूलाई नियमावली अनुसारकै नयाँ लोगो दिइएको छ । त्यो पनि चौघेरा सुनको र बेसमा चाँदीजडित ।

हालको लोगोमा महिला र पुरुषले हात मिलाएको चित्र अंकित छ ।  नयाँ लोगोको चौघेरा स्वर्ण रंगको छ । धानको बालादेखि दुई हात पनि सुनौलो रंगका नै छन् । लोगोभित्र निलो रंग प्रयोग गरिएको छ, जसको अर्थ आकाश हुने बताइएको छ ।

खरानी रंगको पृष्ठभूमिमा सुनौला अक्षरले गण्डकी प्रदेशसभा लेखिएको छ । गण्डकी प्रदेशको भूगोलमाथि भने नेपालको झन्डा राखिएको छ । गण्डकीको लोगोको चौघेरा ३२ मिलिमिटरको छ भने मोटाइ दुई मिलिमिटरको छ ।

यही लोगोलाई वर्षको अन्त्यमा आएर प्रदेशसभा सचिवालयले प्रदेशसभा सदस्यहरूलाई उपलब्ध गराएको हो ।

सचिवालयका अनुसार यो लोगो पनि चीनमा नै तयार भएर आएको हो । पहिलाको तुलनामा अहिलेको लोगोकोको मूल्य दोब्बर छ ।

सचिवालयले दिएको जानकारी अनुसार अहिले प्रदेशसभा सदस्यहरूलाई उपलब्ध गराइएको लोगोको मूल्य १३ हजार २७७ रुपैयाँ ५० पैसा पर्न आउँछ । सचिवालयमा बजेट नभएका कारण लोगो छपाइका लागि अर्थ मन्त्रालयसँग थप बजेट माग गरिएको थियो ।

सचिवालयले मागेको १० लाख रुपैयाँ अर्थले उपलब्ध गराएपछि लोगो छपाइ गरिएको थियो । सचिवालयले यो मूल्यमा ७३ वटा लोगो छापेको छ ।

प्रदेशसभा नियमावलीको अनुसूची ८ मा प्रतीक चिह्न (लोगो) को व्यवस्था गरिएको छ । यो लोगो नियम २२२ सँग सम्बन्धित छ ।

‘सदस्यहरूले प्रयोग गर्ने प्रतीक चिह्न (लोगो) अनुसूची ८ बमोजिमको हुनेछ । त्यस्तो प्रतीक चिह्नको प्रयोग र सम्मानमा सदस्यले उचित ध्यान दिनुपर्नेछ,’ उपनियम २ मा भनिएको छ ।

प्रस्तावित नियमावली, २०८० को अनूसूची ८ मा प्रतीक चिह्नको व्यवस्था गरिएको छ । प्रदेशसभा सदस्यहरूको पोसाक (ड्रेसकोड) र प्रतीक चिह्न कार्यव्यवस्था परामर्श समितिको परामर्शमा सभामुखले तोक्ने व्यवस्था छ ।