पोखरा । गण्डकी प्रदेशमा नेकपा (एमाले)का एक प्रदेशसभा सदस्यलाई पार्टीका तर्फबाट स्पष्टीकरण सोधिएको छ । स्पष्टीकरण सोधेको विषय बाहिरिएकामा एमाले संसदीय दलका प्रमुख सचेतक भने रुष्ट छन् ।

प्रमुख सचेतक गोविन्दबहादुर नेपालीले प्रदेशसभा सदस्य गणेशमान गुरुङलाई शनिबार स्पष्टीकरणपत्र थमाएका छन् । उक्त पत्रमा ‘ह्वीप लगाइसकेको अवस्थामा सांसद गुरुङ प्रदेशसभा बैठक छाडेर किन बाहिरिएको ?’ भनि सोधिएको छ ।

शुक्रबार (हिजो)को प्रदेशसभा बैठकमा आउँदो आर्थिक वर्षको सरकारको नीति तथा कार्यक्रम पारित गर्ने कार्यसूची थियो । बैठकमा आफ्ना सांसदलाई विपक्षमा ध्वनिमत दिन एमालेले ह्वीप जारी गरेको थियो । तर, नीति तथा कार्यक्रम निर्णयार्थ पेस गरिँदा सांसद गुरुङ त्यहाँ थिएनन् । सोही कारण एमाले प्रमुख सचेतक नेपालीले गुरुङलाई स्पष्टीकरणपत्र थमाएका हुन् ।

सांसद गुरुङले भने आफूले मोबाइल घरमै भुलेर गएका कारण ह्वीपबारे कुनै जानकारी नभएको हुँदा प्रदेशसभाबाट बाहिरिएको बताएका छन् । आफूलाई थाहै नभएको विषयमा स्पष्टीकरण सोधिनुलाई उनले राजनीतिक पक्षधरता पनि हुन सक्ने आशंका गरे ।

किनभने, एमाले संसदीय दलका नेता खगराज अधिकारीले गण्डकीमा एउटा समूहको प्रतिनिधित्व गर्छन् । सांसद गुरुङ एमाले उपमहासचिव पृथ्वीसुब्बा गुरुङ समूहका हुन् ।

स्पष्टीकरणका विषयमा सांसद गुरुङको भनाइ पढ्नोस्–
हिजो नीति तथा कार्यक्रम पारित गर्ने दिन थियो, महत्त्वपूर्ण हुनु स्वाभाविक हो । प्रदेशसभा बैठक हुने हरेक दिन संसदीय दलको बैठक हुने गर्थ्यो । अस्ति थियो, तर हिजोचाहिँ थिएन । म समयमा नै गएको छु । मैले साथीहरूसँग आज केही रहेन छ कि क्या हो भनेर सोधेँ, उहाँहरूले केही छैन भन्नुभयो । हिजो प्रदेशसभा बैठकमा पनि लाइन नआएका कारण एसीको समस्या थियो । प्रदेशसभाको जनाउ घण्टी बज्यो, भित्र गएँ । हिजो बैठक पनि ढिला गरी सुरु भयो । ११ बजे भनेता पनि समयमा सुरु भएन ।

प्रदेशसभाको हलको पहिलो रोमा दलको नेता, दोस्रो रोमा प्रमुख सचेतक बस्नुहुन्छ । मेरो सिट तेस्रो रोमा हो । गर्मीका कारण म भित्र–बाहिर गरिरहेको थिएँ । मैले मेरो प्रस्तुति राखेँ । राखिसकेपछि ह्वीप पनि छैन, मेरो बाहिर विशेष काम पनि थियो, दिनको सवा २ बजेतिर म निस्केँ ।

हिँडेपछि सवा ४ बजेदेखि मेरोमा फोनहरू आएको रहेछ, मैले उठाइन, केयर नै गरिनँ भनौँ । मेरो काम थियो, म काममा नै ध्यान दिएँ । बेलुका ६ बजेतिर हेरेको फोनहरू आएको रहेछ । अर्का माननीयले फोन गर्नुभएको रहेछ, मैले उठाएँ । उहाँले सोध्नुभयो– किन आउनु भएन ?

मैलेचाहिँ आज ह्वीप छैन, बहुमत पु¥याउने सरकारले हो, हामी नभए पनि हुन्छ, नीति तथा कार्यक्रम पास गर्ने पनि उनीहरूको कुरा हो भनेँ । ह्वीप पनि छैन भनेपछि म हिँडेकै हो । तर, आज बिहान प्रमुख सचेतकले मैले तपाईंलाई १ बजेर १ मिनेट जाँदा म्यासेज पठाएको छु भन्नुभयो ।

हाम्रो प्रदेश सांसदको म्यासेन्जर ग्रुप छ, त्यहाँ म्यासेज छैन भनेर मैले भनेँ । उहाँले चाहिँ पठाएको छु भन्नुभयो । मैले आज बल्ल साढे ३ बजे म्यासेज देखेँ, उहाँले म्यासेन्जरमा नभई मोबाइल नम्बरमा पठाउनुभएको रहेछ ।

मैले तपाईंपछाडिको रोमा छु, साढे २ बजेसम्म सदनमा नै छु, त्यतिन्जेल मलाई कसैले जानकारी गराउनु भएन, मैले मोबाइल घरमा भुलेकै हो । मैले म्यासेज कति बेला हेरेको रहेछु, अहिलेको प्रविधिले हेर्न मिल्ला नि त, मैले त्यही भनेँ ।

बाघ कराएको, बाख्रा हराएको पनि हुनसक्छ । अहिले अधिवेशनहरू भइरहेका छन्, त्यता गएको हो कि भन्ने पनि लागेको होला । मलाई आज स्पष्टीकरणपत्र बुझाएपछि मैले उहाँलाई माथिकै कुराहरू भनिसकेँ । पत्र बुझेपछि मैले तपाईंले पठाएको म्यासेज कति बेला हेरेँ चेक गराउनुहोस् भनेको छु । मैले थाहा नै नपाएको कुरामा कसरी ह्वीप उल्लंघन हुन्छ त ?