काठमाडौं । नेपाली कांग्रेसका प्रवक्ता प्रकाशशरण महतले समाजिक सञ्जालमा गलत कुराको प्रचारबाजी गर्ने काम बढ्दै गएको बताएका छन् ।

भारतीय वर्किङ जर्नालिस्ट युनियनले शुक्रबार काठमाडौंमा आयोजना गरेको सेमिनारमा उनले सो कुरा बताएका हुन् ।

साथै प्रवक्ता महतले भारत र चीनको बीचमा भएकाले नेपाल सानो जस्तो देखिए पनि सानो देश नभएको बताए । उनले जनसंख्या र भूगोलको हिसाबले विशाल देश भारतको हृदय पनि विशाल हुनुपर्ने भनाइ राखे । नेपाल र भारतको सम्बन्ध युगौँदेखिको भएको भन्दै महतले सम्बन्धलाई सुमधुर बनाउन दुवै देश सचेत हुनुपर्नेमा जोड दिए ।

महतले हिन्दु धर्मावलम्बीहरूका आस्थाका केन्द्र पशुपतिनाथ, मुक्तिनाथ र बौद्ध धर्मावलम्बीहरूको उद्गमस्थल लुम्बिनीको दर्शन गर्न आह्वान गरे । “हिन्दु धमौवलम्बीहरूका आस्थाका केन्द्र पशुपतिनाथ, मुक्तिनाथ र बौद्ध धर्मावलम्बीहरूको उद्गमस्थल लुम्बिनी पनि हाम्रै नेपालमा छन् । यी पवित्र धार्मिकस्थलहरूको दर्शन गर्न म सबैलाई आग्रह गर्दछु,” उनले भने ।