काठमाडौं । जनता समाजवादी पार्टी (जसपा) नेपालको एकताको राष्ट्रिय महाधिवेशनबाट केन्द्रीय कार्यसमिति चयनका लागि निर्वाचन प्रक्रिया जारी छ ।

जनकपुरधामस्थित महेन्द्र नारायण निधि भवनमा जारी महाधिवेशनबाट २०१ सदस्यीय केन्द्रीय समिति चयन हुनेछ । जसका लागि बुधबार बिहान उमेदवारी दर्ताको कार्य भएको निर्वाचन समितिले जनाएको छ । 

समितिमा पदाधिकारी २०, सदस्य १८१ गरी २०१ सदस्यीय केन्द्रीय समिति रहने छन् । पदाधिकारीमा अध्यक्ष एक, सहअध्यक्ष एक, उपाध्यक्ष पाँच, महासचिव दुई, उपमहासचिव तीन, सचिव सात र कोषाध्यक्ष एकजना रहने प्रावधान छ । सोहीअनुसार उक्त पदमा उमेदवारी दिने कार्य अगाडि बढाइएको हो । 

पार्टीको विधानअनुसार महिला, आदिवासी/जनजाति, मधेसी, खस आर्य, थारु, दलित, मुस्लिम, अपांगता र अल्पसंख्यक, प्रवास समूह समेतको संख्या सुनिश्चित गरिएको छ । अध्यक्षमा उपेन्द्र यादव नै रहने सुनिश्चित भएको छ भने अन्य पदमा मित्रवत प्रतिस्पर्धा हुने भएको जनाइएको छ ।