काठमाडौं । काठमाडौं उपत्यका ट्राफिक प्रहरी कार्यालयले चोरी भएका १९ वटा दुईपांग्रे सवारी साधन नियन्त्रणमा लिएर सम्बन्धित धनीलाई बुझाएको छ । विभिन्न मितिमा हराएको उजुरीका आधारमा उपत्यकाको विभिन्न ठाउँबाट नियन्त्रणमा लिएर प्रहरीले सवारीधनीलाई आइतबार हस्तान्त्रण गरेको हो ।

कार्यालयका एसएसपी जीवनकुमार श्रेष्ठका अनुसार १९ वटा दुई पांग्रे सवारीमध्ये ६ वटा स्कुटर र १३ वटा मोटरसाइकल छन् । चोरी गरिएकामध्ये अधिकांश सवारी साधनको वास्तविक नम्बर प्लेटमा नक्कली प्लेट राखेर चलाएको अवस्थामा फेला परेका छन् ।

पछिल्लो सयम अधिकाशं मोटरसाइकलहरू नागढुंगा, बौद्ध, एयरपोर्ट, काँडाघारी, सुकेधारा, महाराजगञ्ज, नयाँ बसपार्क, नेपालटार, माकलबारी, स्वयम्भू, सोह्रखुट्टे र ठमेललगायतका स्थानबाट बढी हराउने गरेको उजुरी प्रहरीमा पर्ने गरेको छ ।

ट्राफिक प्रहरीले आइतबार बुझाएको १९ वटा सवारीबाहेक चालु आर्थिक वर्षमा मात्रै चोरी भएर नियन्त्रणमा लिएका ३८३ वटा सवारीसाधन सम्बन्धित धनीलाई बुझाएको छ ।

यसरी चालु आर्थिक वर्षको कुल १० महिनामात्रै प्रहरीले ४०२ सवारीसाधन फेला पारेको हो । त्यसमध्ये १७ वटा सवारीसाधन भन्सार छली गरेर नेपाल भित्र्याएको खुलेको छ ।

यसरी सवारी साधन चोरीमा संलग्न ३६ जनालाई पक्राउ गरेर प्रहरी परिसर काठमाडौं मातहतका विभिन्न कार्यालय बुझाएको एसएसपी श्रेष्ठले बताए ।

प्रहरीले सवारी धनीहरूलाई चोरी तथा हराउनबाट जोगाउन आफ्नो सवारीसाधन सुरक्षित स्थानमा पार्किङ गर्न तथा ह्विल लक, चेन लक, ह्यान्डिल लक, डिस्क लकलगायत सुरक्षा साइरनहरू जडान गर्न समेत सुझाव दिएको छ ।