काठमाडौं । नेकपा (एमाले)का प्रमुख सचेतक महेश बर्तौलाले सहकारी संस्थाको बचत रकम दुरुपयोग सम्बन्धमा गठित संसदीय छानबिन विशेष समितिले तीन महिनाभित्रै प्रतिवेदन ल्याउनुपर्नेमा आफ्नो पार्टी स्पष्ट रहेको बताएका छन् ।

बुधबार प्रतिनिधिसभा बैठकपछि सञ्चारकर्मीहरूसँग कुराकानी गर्दै उनले सहकारी संस्थाको बचत रकम दुरुपयोग सम्बन्धमा गठित संसदीय छानबिन विशेष समितिले तीन महिनाभित्रै प्रतिवेदन ल्याउनुपर्ने एमालेको स्पष्ट अडान रहेको बताए । 

उनले यस समितिमा एमालेको भूमिकाप्रति आशंका गर्नेहरूले नै तीन महिनाभित्र काम सम्पन्न गरी प्रतिवेदन ल्याउन नदिनसक्ने भन्दै यसप्रति आफूहरू सचेत रहेको स्पष्ट पारे । समितिको कामलाई अवरोध सिर्जना गर्नु नहुने बताए ।

"त्यो आरोप लगाउनेहरू नै सहकारीपीडितहरूलाई न्याय दिन चाहँदैनन् । उनीहरू नै यो तीन महिनामा प्रतिवेदन ल्याउन दिँदैनन् । उनीहरू नै यो विशेष समितिलाई काम गर्न नसक्ने बनाउँछन् । किनकी तपाईं हेर्दै जानुस्, हरेक दिन सहकारीपीडितहरू, सहकारी ठगहरू अरु कोही होइनन् आरोप लगाउनेहरू नै उहाँहरूकै दलका चारतारे झन्डा बोकेकै मान्छेहरू एक पछि अर्को भेट्न पाउनु हुनेछ," उनले भने ।

प्रमुख सचेतक बर्तौलाले समितिले राम्रोसँग काम गरी तोकिएकै समयमा प्रतिवेदन पेस गर्ने बताए ।