![बजेटमाथिको छलफलमा अर्थमन्त्रीको खोजी, १५ मिनेट बैठक स्थगित](https://12khari.top/uploads/posts/rajendra-lindeen-1717492087.jpg)
काठमाडौं । प्रतिनिधिसभा बैठकमा बजेटमाथिको छलफलका क्रममा अर्थमन्त्री वर्षमान पुनको खोजी गरिएको छ । प्रतिपक्ष दल राष्ट्रिय प्रजातन्त्र पार्टी (राप्रपा)का अध्यक्ष राजेन्द्र लिङदेनले मंगलबार बजेटमाथिको छलफलका क्रममा अर्थमन्त्रीको खोजी गरेका हुन् ।
बोल्न रोस्ट्रममा पुगेपछि उनले अर्थमन्त्री बैठकमा नदेखिएको बताए । उनले आफ्नो कुरा अर्थमन्त्रीले नसुने कुन मन्त्रीले सुन्ने ? भन्दै प्रश्न गरे ।
जवाफमा सभामुखको आसनमा रहेकी उपभामुख इन्दिरा रानामगरले अर्थमन्त्री राष्ट्रियसभा बैठकमा जवाफ दिन गएको जानकारी गराइन् । उनले आफ्नो भनाइ राख्न लिङदेनसँग आग्रह गरिन् ।
तर, लिङदेनले मानेनन् । उनले बरु केही समय बैठक स्थगन गर्न र ‘अर्थमन्त्री पर्खौँ’ भने ।
यसैबीच, समय लिँदै नेकपा (एमाले)का सांसद दयालबहादुर शाहीले संसदीय गरिमा कायम राख्न आग्रह गरे । सदन दोहोरी खेल्ने ठाउँ नभएको उनले उल्लेख गरे । “बोल्न गएपछि सरासर बोल्नुपर्छ, सभामुखसँग दोहोरी खेल्नु हुँदैन,” उनले भने ।
शाहीले बोलेपछि राप्रपाका सांसद आसनमा उठेर विरोध गरे । राप्रपाका प्रमुख सचेतक ज्ञानेन्द्रबहादुर शाहीले राष्ट्रिय दलको संसदीय दलको नेता बोल्न गएको र मन्त्री खोज्दा कसरी दोहोरी भयो ? भन्दै प्रश्न गरे । “अर्थमन्त्री खोजेको कुरा दोहोरी हुन्छ ? अर्थमन्त्री हुनुपर्छ । संसद् कसैको पेवा होइन,” उनले भने ।
त्यसपछि सभामुख देवराज घिमिरेले १५ मिनेटका निम्ति संसद् बैठक स्थगन गरिएको जानकारी गराए । स्थगित संसद् बैठक पुनः सुरु भइसकेको छ ।