काठमाडौं । नेकपा (एमाले)का प्रमुख सचेतक महेश बर्तौलाले सुझाव राखेकै कारण सत्तारुढ दलहरूको खटपट सुरु भयो भन्नेकुरा गलत भएको बताएका छन् ।

सोमबार प्रतिनिधिसभाको बैठकपछि सञ्चारकर्मीहरूसँग कुरा गर्दै उनले यस्तो बताएका हुन् । उनले सुझाव दिएकै कारण एमाले र नेकपा (माओवादी केन्द्र)को बीचमा असन्तुष्टि हुन लागेको भन्नेकुरामा सत्यता नरहेको स्पष्ट पारे ।

बजेटमा सत्ता पक्षका सांसदहरूले पनि आफ्नो कोणबाट सुझाव दिन उपयुक्त हुने बताए । बजेटप्रति एमालेको आक्रोश, नकारात्मक टिप्पणी र असन्तुष्टि नभइ सुझावहरू मात्रै रहेको उल्लेख गरे ।

"यो छलफललाई सत्ता पक्षका माननीयज्यूले पनि आफ्नो कोणबाट सुझाव दिन उपयुक्त ठान्नेकुरालाई अस्वभाविक मान्नु भएन । हामीले यो बजेटमा अलिकति छलफल भएको भए हुन्थ्यो भन्ने अपेक्षा हो । तथापि, यो बजेट जुन आएको छ, यो बजेटप्रति हाम्रो आक्रोश छैन, नकारात्मक टिप्पणी छैन, असन्तुष्टि, आलोचना छैन । यो बजेटप्रति हाम्रो केही सुझावहरू छ । छलफल गर्न सकेको भए राम्रो हुन्थ्यो भन्ने हो," उनले भने । 

उनले बजेटमा एमालेले राजनीतिक रूपमा समर्थन गरेर अघि बढ्ने बताए ।