![पुँजी पलायन रोक्नुपर्छ : सांसद कुँवर](https://12khari.top/uploads/posts/sher-bahadur-kunwar4-1717403060.jpg)
काठमाडौं । नेकपा (एकीकृत समाजवादी)का सांसद शेरबहादुर कुँवरले पुँजी पलायनलाई रोक्नुपर्ने बताएका छन् । सोमबार प्रतिनिधिसभा बैठकमा आर्थिक वर्ष २०८१/०८२ को राजस्व र व्ययको वार्षिक अनुमान (बजेट)माथिको सामान्य छलफलका क्रममा बजेटले पुँजी पलायनलाई रोक्न ध्यान पुर्याउन नसकेको बताए ।
युवा विदेशिइरहेका तथा मध्यम र निम्नवर्ग आयस्रोतमा नजोडिएका कारण पनि पुँजीको परिचालन हुन नसकेको उनले उल्लेख गरे । उनले अर्थमन्त्री वर्षमान पुनले निराशालाई आशामा परिणत गर्ने गरी बजेट ल्याएको पनि बताए ।
“...यो बजेटमा अर्थमन्त्रीले केही साहस गर्नुभएको छ । केही आश्वस्त पनि पार्नुभएको छ,” उनले भने, “हरेक क्षेत्रमा छाएको निराशालाई आशामा परिणत गर्ने प्रयास अर्थमन्त्रीले गर्नुभएको छ ।”
सांसद कुँवरले कृषि क्षेत्रमा आधुनिकीकरण र बिचौलियाको अन्त्य गर्नुपर्ने बताए । बजेटले विदेश पलायन हुने विद्यार्थीलाई रोक्न नसकेको भन्दै उनले यसतर्फ पनि सरकारको ध्यानाकर्षण गराए । न्युज एजेन्सी नेपाल