काठमाडौं । प्रमुख प्रतिपक्ष दल नेपाली कांग्रेसका सांसद तेजुलाल चौधरीले अर्थमन्त्री वर्षमान पुनलाई मधेस प्रदेश तपाईंको सौता हो ? भन्दै प्रश्न गरेका छन् । आइतबारको प्रतिनिधिसभा बैठकमा आगार्मी आर्थिक वर्षको बजेटमाथिको सैद्धान्तिक छलफलमा बोल्दै उनले मधेस प्रदेशलाई बजेट दिन किन हेपेको भन्ने प्रश्न गरे ।

कर्णालीलगायत अन्य प्रदेशमा त्यति धेरै पैसा पठाउँदा मधेसलाई भने दोस्रो दर्जाको रूपमा व्यवहार गरिएको उनको तर्क छ । “अघिल्लो पटक मधेस र कर्णाली प्रदेशमा कम बजेट गएको थियो । यसपटक कर्णालीमा १६ अर्ब बढी बजेट गयो । मधेसमा गएन,” उनले भने, “के मधेस प्रदेश तपाईंको सौता हो ? कालो मानिस देख्दैमा तपाईं बजेट नदिने ? मधेस तपाईंको दोस्रो दर्जाको व्यक्ति हो ?”

उनले कर्णालीमा १६ अर्ब बढी बजेट जाँदा मधेसमा ११ अर्ब रूपैयाँमात्र बजेट दिइएको भन्दै आपत्ति जनाए । “मधेसलाई पुँजीगत खर्च एक अर्बमात्र जबकी कर्णालीमा तीन अर्ब गएको छ, वाग्मतीमा तीन अर्ब बढी । समानीकरण ससर्त अनुदान मधेस प्रदेशमा नजाने ?,” उनले भने ।

सत्ता पक्षका दल नेकपा (एमाले) अध्यक्षले यो बजेट अर्थमन्त्रीको बजेट हो कि अर्थमन्त्रीको पार्टीको बजेट वा नेपाल सरकारको बजेट कसको हो छुट्टाउनै गाह्रो भएको भन्ने कुरा यर्थाथ भएको उल्लेख गरे ।