न्युयोर्क । अमेरिकाका पूर्वराष्ट्रपति डोनाल्ड ट्रम्पलाई न्युयोर्कस्थित अदालतले एक यौन अभिनेत्रीलाई घुस दिएर निर्वाचनअघि चुप बस्न लगाएको अभियोगमा दोषी ठहर गरेको छ । त्यससम्बन्धी सजाय आउँदो जुलाई ११ मा सुनाइनेछ । ट्रम्पले उक्त फैसलालाई सर्मनाक र धाँधली भएको बताएका छन् ।

अमेरिकाको इतिहासमा पहिलोपटक बहालवाला वा पूर्वराष्ट्रपतिविरुद्ध आपराधिक मुद्दा चलेर दोषी ठहर गरिएको हो । अमेरिकाका राष्ट्रपति जो बाइडेनको प्रचार अभियान चलाउने टिमले फैसलालाई उचित भन्दै कोही पनि कानुनभन्दा माथि नहुने जनाएको छ ।

ट्रम्प रिपब्लिकन पार्टीका तर्फबाट राष्ट्रपति पदका उमेदवार हुन् । ट्रम्पको प्रचार टिमले फैसला सार्वजनिक भएपछि उनलाई राजनीतिक बन्दीका रूपमा पेस गर्दै अब अझै ‘ब्यालेट’बाट हराउन बाँकी रहेको जनाएको छ ।

ट्रम्पमाथि सन् २०१६ को राष्ट्रपति निर्वाचनअघि ‘पोर्नस्टार’ स्टर्मी डेनियल्सलाई चुप लगाउन रकम भुक्तानी गरेको विषय लुकाउन आफ्नो कारोबार रेकर्डमा हेरफेर गर्ने समेतका ३४ आरोप लगाइएको थियो । उनले आरोपको खण्डन गर्दै आएका थिए ।

चुनाव लड्न सक्छन् ?
दोषी सावित भए पनि ट्रम्प आउँदो नोभेम्बरमा हुने राष्ट्रपति निर्वाचनमा उमेदवार बन्न पाउनेछन् । अमेरिकी संविधानमा राष्ट्रपति उमेदवारका निम्ति अपेक्षाकृत रूपमा न्यून मापदण्ड मात्र छ । उमेर कम्तीमा ३५ वर्षको हुनुपर्ने, अमेरिकाको आजन्म नागरिक हुनुपर्ने र अमेरिकामा १४ वर्षदेखि बसेको हुनुपर्ने प्रावधान छ ।

आपराधिक रेकर्ड भएको उमेदवारलाई चुनाव लड्नबाट रोक्ने कुनै कानुन अमेरिकामा छैन । जेलको बन्दी व्यक्ति पनि राष्ट्रपतिको चुनाव लड्न सक्छन् । बीबीसीबाट ।