काठमाडौं । अमेरिका र वेस्ट इन्डिजमा आउँदो जुनदेखि सुरु हुने आईसीसी ट्वान्टी–२० विश्वकप खेल्न क्रिकेटर सन्दीप लामिछानेले भिसा नपाएको विषय अहिले चर्को चर्चामा छ । तर, खेलाडीले भिसा नपाउँदा नेपाल क्रिकेट संघ (क्यान)का केही उच्च पदाधिकारी परिवारसहित आईसीसी विश्वकप क्रिकेट हेर्न भन्दै अमेरिका प्रस्थान गरेका छन् । 

क्यानका अध्यक्ष चतुरबहादुर चन्द र कोषाध्यक्ष पदम खड्का श्रीमतीसहित अमेरिका प्रस्थान गरेका हुन् । उनीहरू मंगलबार अमेरिका प्रस्थान गरेका हुन् । अध्यक्ष चन्द नेपालबाट विश्वकपमा सहभागी भएको २५ जनाको खेलाडी र अफिसियलको कोटामै अमेरिका पुगेका हुन् । विश्वकपका लागि जाने २५ जना टिमको सम्पूर्ण खर्च आईसीसीले नै बेहोर्ने गर्दछ ।

यस्तै, उनीहरूले प्रतियोगिता अवधिको भत्ता समेत पाउँछन् । २५ जना टोलीभित्र रहेको सबै बिजनेस क्लास फ्लाइटमा यात्रा गर्न पाउँछन् र बसाइँको खर्च पनि आईसीसीकै कोटामा पर्छ । आईसीसीले क्यानलाई १५ जना खेलाडी, प्रशिक्षक र अफिसियलको कोटा उपलब्ध गराएको थियो । 

२५ सदस्यीय नेपाली टिमको नेतृत्व क्यानकै केन्द्रीय सदस्य दिवाकर घलेले गरिरहेका छन् । नेपाली टिम झन्डै एक महिनाअघि गए पनि घले भने गत साता मात्रै अमेरिका प्रस्थान गरेका थिए । 

यस्तै, क्यानका केन्द्रीय सदस्य प्रदीप मजगैंया म्यानेजरको भूमिकामा टिमसँगै गएका थिए । क्यान पदाधिकारीबाहेक सचिव पारस खड्काले नागार्जुन नगरपालिकाका मेयर मोहन बस्नेतलाई पनि विश्वकपका लागि अमेरिका जान क्यानबाट निम्तोको पत्रसमेत पठाएका छन् । क्यान स्रोतका अनुसार सचिव पारससँगै अन्य केन्द्रीय सदस्यहरू पनि केही दिनमै अमेरिका प्रस्थान गर्ने तयारीमा छन् । 

विश्वकपका लागि युवा तथा खेलकुद मन्त्रालय र राष्ट्रिय खेलकुद परिषद्‌बाट पनि केही व्यक्ति त्यसतर्फ जान तयारीमा रहेको जनाइएको छ । 

क्यानका केन्द्रीय सदस्य दुर्गाराज पाठक अध्यक्ष नै टिम अफिसियलको रूपमा जानुले राम्रो सन्देश नदिने बताउँछन् । “अध्यक्ष आफैँ टिम अफिसियलमा नगएको भए राम्रो हुने थियो । खेलाडी भिसा प्रक्रियामै हुँदा अध्यक्षजस्तो मान्छे यसरी जानुले राम्रो सन्देश दिँदैन । क्यानबाट निम्तो पनि कतिजनालाई गएको हो भन्ने जानकारी माग गरेका छौँ,” पाठकले भने ।

यता, क्रिकेटर सन्दीप भिसा नपाएर नेपालमै रोकिँदा विश्वकपमा उनको सहभागिता अनिश्चित बनेको छ । यसअघि सन्दीपको भिसा २०२५ सम्म रहेको थियो । तर, उच्च अदालत पाटनबाट सफाइ पाएपछि भने उनको भिसा रद्द भएको जानकारी गराइएको थियो । त्यसपछि नयाँ प्रक्रिया सुरु गर्दा अमेरिकी दूतावासले सन्दीपलाई भिसा नदिएको हो । 

भिसा किन नदिइएको भन्ने विषयमा भने दूतावासले ‘अमेरिकी कानुनअनुसार भिसासम्बन्धी अभिलेखहरू गोप्य हुने भएकाले भिसाको कुनै केस विशेषमा टिप्पणी गर्न नसक्ने’ जनाएको छ । सन्दीपको भिसाका विषयमा क्यानले प्रक्रिया थालेको जनाए पनि यसबारे हालसम्म कुनै उपलब्धि भएको देखिएको छैन । यसैकारण सन्दीपको विश्वकप खेल्ने सम्भावना लगभग समाप्त भएको उनी निकट स्रोतले जनाएको छ । दूतावासबाट आज दिनभरीमा सकारात्मक परिणाम नआए सन्दीपको अमेरिका यात्रा यस पटक हुने छैन ।