काठमाडौं । महावीर स्टडिज एन्ड एथ्लेटिक्स एसोसियसनविरुद्ध ४–० को जित निकाल्दै सर्लाहीको वाग्मती युवा क्लब सहिद स्मारक ‘सी’ डिभिजन लिगको शीर्ष स्थानमा उक्लिएको छ ।

बुधबार सातदोबाटोस्थित एन्फा मुख्यालयमा भएको खेलमा वाग्मतीलाई जित दिलाउन राज भुसालले दुई गोल गरे । शृजनराज गौतम र दीपेश राईले समान एक गोल गरे ।

पहिलो हाफको इन्जुरी समयमा दीपेशले गोल गरेपछि वाग्मतीले १–० को अग्रता बनाएको थियो । ५३औँ मिनेटमा शृजनको गोलमा वाग्मतीले अग्रता दोब्बर बनायो । ५७औँ मिनेटमा राज भुसालले क्लबका लागि तेस्रो गोल गरे । त्यसको अर्को मिनेटमा राजले नै गोल गरेपछि वाग्मतीले ४–० को जित सुनिश्चित गरेको हो । 

त्यसअघि खेलको ३५औँ मिनेटमा महावीरका सुरज थारु र वाग्मतीका अभिषेक वाइबाले रातो कार्डको दर्शन गरेपछि दुवै टिम १० खेलाडीमा समेटिएका थिए । त्यसको दुई मिनेटपछि अनिलबहादुर गुरुङले पनि रातो कार्ड बेहोर्दा महावीर नौ खेलाडीमा सीमित बनेको थियो ।

जितसँगै नौ खेलबाट २० अंक जोडेको वाग्मती तालिकाको शीर्ष स्थानमा उक्लिएको छ । समान खेलबाट नौ अंक जोडेको महावीर तालिकाको ११औँ स्थानमा छ ।