काठमाडौं । प्रमुख प्रतिपक्षी दल नेपाली कांग्रेस सहकारीपीडितको मुद्दा लिएर सडकमा उत्रिने भएको छ । बुधबार बसेको कांग्रेस केन्द्रीय कार्यसमिति र पार्टीको संसदीय दलको संयुक्त बैठकले सहकारीपीडितको मुद्दा लिएर सडकमा उत्रिने निर्णय गरेकाे हाे ।

का‌ंग्रे‍सले आगामी आइतबार काठमाडौं केन्द्रित आन्दोलन गर्ने तयारी गरेको केन्द्रीय सदस्य अजयबाबु सिवाकोटीले जानकारी दिए । सहकारी ठगीको आरोप लागेका गृहमन्त्रीमाथि संसदीय छानबिन माग गर्दै सदन अवरुद्ध गरेको कांग्रेसले काठमाडौं केन्द्रित आन्दोलनका लागि उपत्यकाका १५ निर्वाचन क्षेत्रमा केन्द्रीय प्रतिनिधि खटाउने उनले जानकारी दिए । 

‘आन्दोलनमा बढी भन्दा बढी जनसहभागिता गराउनका लागि काठमाडौ, ललितपुर र भक्तपुरका १५ वटै निर्वाचन क्षेत्रमा केन्द्रीय प्रतिनिधि खटाइनेबारे छ्लफल भएको छ,” सदस्य सिवाकोटीले भने । 

कांग्रेसले आफ्नो निर्णयमा सहकारीका बचतकर्ताको बचत फिर्ता र ठगी संलग्नमाथि कारबाही माग गरेको छ । उसले नेपाली कांग्रेसमाथि सदनमा गृहमन्त्रीले लगाएको गम्भीर आरोपमाथि छानबिन गरी दोषीमाथि कारबाहीको माग गरेको छ ।