काठमाडौं । सोमबार साँझ काठमाडौं महानगरपालिकाका मेयर बालेन्द्र शाह ‘बालेन’को एउटा फेसबुक स्टाट्स क्षणभरमै भाइरल भयो । बालेनको स्टाट्स यसरी भाइरल भएको यो पहिलो पटक भने होइन ।

नौ महिनाअघि सुत्केरी जाँचका लागि अस्पताल जाँदै गरेकी आफ्नी श्रीमती सवार महानगरपालिको सरकारी गाडी कोटेश्वरमा ट्राफिक प्रहरीले रोकेको झोकमा सिंहदरबार नै जलाउने धम्कीसहितको स्टाट्स पनि यस्तैगरी भाइरल भएको थियो । 

सरकारी गाडी शनिबार विदाका दिन चलाएपछि ट्राफिक प्रहरीले रोक्दै जाँचेको थियो । शनिवार पूर्वअनुमतिबेगर सरकारी गाडी चलाउन मिल्दैन ।

यसबाहेक पनि बालेनले लेखेका अन्य स्टाट्ससमेत प्रायः विवादित बन्दै आएका छन् ।  सिंहदरबार जलाउने स्टाट्सलाई अराजक ठान्दै सरकारले मेयर बालेनलाई पक्राउ गर्ने तयारी समेत गरेको खुलासा भएको थियो ।

जनमत पार्टीका अध्यक्ष डा. सीके राउतले प्रधानमन्त्री पुष्पकमल दाहाल प्रचण्डले नै प्रहरी प्रमुख र सेना प्रमुखलाई बोलाएर पक्राउ गर्न निर्देशन दिएको बताएका थिए ।  

तर, नेपाली कांग्रेस सभापति शेरबहादुर देउवाले ‘लोकतन्त्रमा बोल्ने छुट भएको’ भन्दै पक्राउ गर्न नहुने अडान लिएपछि सरकार पछि हटेको उनको दाबी थियो ।

सोमबार पनि बालेनले फेरि उही प्रकृतिको स्टाटस लेखे । घटना क्रममा पनि करिब–करिब मिल्दो जुल्दो देखिन्छ ।

सोमबार महानगरकै फोहोर बोक्ने गाडीबीच बाटोमा रोकिएको भन्दै प्रहरीले नियन्त्रणमा लियो । त्यही झोंकमा बालेनले स्टाटस लेखिदिए, ‘भ्रष्टलाई समाउन सक्नु भएन, काठमाडौंमा फोहोर बाक्ने ४ चालकलाई समाउनु भएछ यो सरकारले ।’

बालेन यत्तिमै रोकिएनन् अगाडि थपे, ‘जबसम्म स–सम्मान चालक रिहा हुँदैनन्, सिंहदरबारलगायत सबै पार्टीका कार्यालयको तथा नेताहरुको घरको फोहोर उठ्दैन । को–को जुध्न आउने हो, आए हुन्छ, कसैलाई बाँकी छाडिँदैन ।’

मंगलबार १२ बजेसम्म बालेनको उक्त स्टाटसमा एक लाख ९७ हजार मानिसले रियाक्ट गरेका छन् । २९ हजार आठ सय जनाले कमेन्ट तथा ११ हजार एक सय जनाले सेयर गरेको देखिन्छ ।

उक्त स्टाट्स लेखेको एक घण्टाभित्रै फेरि अर्को स्टाट्स लेख्दै प्रहरीले समातेका चार जनालाई छोडेको खबर पाएको भन्दै, ‘आफ्ना कुनै कर्मचारी माथि अनाहकमा अपमान महानगरले सहँदैन ।’

यस्तो थियो घटना ?

सोमबार बिहान फोहोर बोकेका महानगरपालिकाका चारवटा टिपर माओवादी केन्द्रको पार्टी कार्यालय कोटेश्वर पेरिसडाँडा जाने उकालो बाटोको छेउमै पार्किङ गरिएको थियो । लामो समयसम्म फोहोरका गाडी पार्किङमा राखिएपछि स्थानीयले प्रहरीलाई खबर गर्दै फोहोरका गाडी हटाइदिन आग्रह गरे ।

स्थानीयको खबरपछि बानेश्वर प्रहरी र कोटेश्वर प्रहरी टोली फोहोरको टिपर पार्किङ गरिएको ठाउँमै पुग्यो । तर, चालक नदेखेपछि प्रहरीले खोजी गर्यो । पछि ती चालकलाई नियन्त्रणमा लिएर पार्किङ गरिएको स्थानबाट टिपर हटाउन लगायो ।

चारवटा टिपरलाई प्रहरीले टेकुस्थित वातावरण विभाग पठायो । टिपरमा प्रहरी पनि सँगै गएका थिए । काठमाडौं प्रहरीका प्रमुख एसएसपी बसन्त रजौरेले टिपर चालकलाई नियन्त्रणमा भने नलिइएको बताए ।

“टिपर चालकलाई पक्राउ गरिएको होइन । बीच बाटोमा फोहोरका टिपर पार्किङ गरिएको खबर स्थानीयले गरेपछि त्यहाँबाट हटाउन लगाएका हौं,” एसएसपी रजौरेले भने ।

स्रोतले दिएको जानकारीअनुसार नुवाकोटको बन्चरेडाँडा ‘ल्यान्डफिल्ड’ साइटको व्यवस्थापनमा सरकारले चासो नदिएपछि काठमाडौं महानगरपालिकाले माओवादी पार्टी कार्यालयअगाडि फोहोर जम्मा गरेर सांकेतिक विरोध जनाउन खोजेको बताए ।

घटनाबारे महानगरपालिकाका सहायक प्रवक्ता दिपक अधिकारीले घटना सबै छताछुल्ल भएकाले थप कुरा गर्न आवश्यक नरहेको प्रतिक्रिया दिए ।