काठमाडौं । प्रमुख प्रतिपक्ष दल नेपाली कांग्रेसका नेता डा. शेखर कोइरालाले प्रधानमन्त्री पुष्पकमल दाहाल ‘प्रचण्ड’ले पटक–पटक विश्वासको मत लिएकामा आपत्ति जनाएका छन् । प्रधानमन्त्री प्रचण्डले यही जेठ ७ गते चौथोपटक संसद्मा विश्वासको मत लिने तयारी गरिरहेका बेला उनले त्यसप्रति आपत्ति जनाएका हुन् ।

नेता कोइरालाले प्रधानमन्त्री प्रचण्डलाई कतिपटक विश्वासको मत लिने ? भनी प्रश्न समेत गरे । “...म यसो गर्छु, उसो गर्छु त भन्नुहुन्छ, तर उहाँलाई अहिले अप्ठ्यारो के परिराखेको छ भने ७ गते विश्वासको मत लिनु छ,” उनले भने, “कतिचोटि विश्वासको मत लिनुहुन्छ ? सरकारमा प्रधानमन्त्री उहाँ नै हुनुहुन्छ । तीनचोटि त भइसक्यो । र, यही तरिकाले सरकार चल्ने हो भने अझ दुई/चारचोटि सरकार फेरिरहन्छ ।”

शनिबार काठमाडौंमा आयोजित एक कार्यक्रममा उनले वर्तमान निर्वाचन प्रणालीका कारण मुलुकमा राजनीतिक अस्थिरता बढेको जिकिर गरे । त्यसलाई परिवर्तन गरेर अघि बढ्ने विषयमा ठूला दल कांग्रेस र नेकपा (एमाले) मिल्नुपर्ने उनले दोहोर्‍याए ।

“...दुईवटा ठूला दल एक ठाउँमा नउभिई दुईतिहाइ बहुमत आउन सक्दैन अहिले । तर, एउटा डर त छ । दुईवटा ठूलो दल एक ठाउँमा उभिँदाखेरि के हुन्छ त भन्दा निरंकुशतातिर देश जान्छ कि भन्ने ठूलो डर छ मान्छेहरूमा र ममा पनि त्यो डर छ,” उनले भने । 

नेता कोइरालाले निर्वाचन प्रणालीमा सुधार गरेर अघि नबढे मुलुकलाई बर्बाद हुनबाट कसैले जोगाउन नसक्ने टिप्पणी गरे । न्युज एजेन्सी नेपाल