मुगु । सुन्दर पर्यटकीयस्थल रारा घुम्ने पर्यटकले अब प्लास्टिकजन्य वस्तु त्यही छोडेर फर्किन नपाउने भएका छन् । 

रारालाई प्लास्टिकमुक्त क्षेत्र बनाउने लक्ष्य लिएको रारा राष्ट्रिय निकुञ्जले यहाँ आउने पर्यटकले अब प्लास्टिकको सट्टा कपडाको झोला बोक्नुपर्ने र अत्याश्यक प्लास्टिकजन्य वस्तु लिएमा फर्किंदासँगै ल्याउनुपर्ने नियम लागु गरिएको निकुञ्जका निमित्त वरिष्ठ संरक्षण अधिकृत राजु घिमिरेले जानकारी दिए । उनले पर्यटकले प्लास्टिकका झोला तथा प्लास्टिकजन्य वस्तु निकुञ्जभित्रै फाल्ने क्रम बढेकाले यस्तो निर्णय लिनुपरेको बताए ।

उनका अनुसार मंगलबारबाट यो नियम लागु गरिएको छ भने निकुञ्जभित्र प्रवेश गर्ने व्यक्तिले आफूसँग लगेका पानीका बोतल, प्लास्टिक झोला, प्लास्टिकमा प्याकिङ गरिएका खानेकुरा त्यहाँबाट फर्किएपछि काउन्टरमा बुझाउनुपर्ने नियम छ ।

“निकुञ्ज क्षेत्रभित्र प्रवेश गर्नुअघि झोलाको जाँच गरेर प्लास्टिकजन्य वस्तुको यकिन गरी अभिलेख राख्ने र घुमेर फर्कदा फेरि काउन्टरमा बुझाउनुपर्ने नियम लगाएका छौँ । नियम पालना नगरेमा दुई सय रुपैयाँसम्म जरिवाना तिर्नुपर्ने छ,” घिमिरेले भने ।

निकुञ्ज कार्यालयले लामो समयदेखि प्लास्टिक न्यूनीकरण अभियान सञ्चालन गरे पनि प्रभावकारी नभएपछि यस्तो नियम लागु गरेको जनाएको छ । पर्यटकले मात्र नभई निकुञ्जभित्र बस्ने नेपाली सेना, निकुञ्ज कार्यालयका कर्मचारीले पनि प्लास्टिकका झोला, खानेकुराका प्याकेटलगायतका सामग्री जथाभावी फाल्न र लिन पाउने छैनन् ।

अभियानलाई सफल पार्न जानकारीमूलक सूचना बोर्ड, पोस्टर र स्टिकर बनाइ प्रवेश नाका र भिडभाड हुने स्थानमा राख्ने योजना निकुञ्जको योजना छ ।

निकुञ्जभित्र प्रवेश गर्ने सल्लेरी, लामाचौर, ताल्चा, जेउड्यासहित चारवटा प्रवेशद्वारमा सुरक्षाजाँच कडा गरिएको छ । निकुञ्ज सुरक्षार्थ खटिएका नेपाली सेना, निकुञ्ज कर्मचारीहरूले रारा क्षेत्रमा नियमित सरसफाइ गर्दै आएका छन् भने नेपाल विद्यार्थी सङ्घ मुगुले पनि गत पुस महिनादेखि प्रत्येक महिनाको अन्तिम शनिबार नियमित सरसफाइ गर्दै आएको छ । 

पछिल्लो समय रारा घुम्ने पर्यटकको सङ्ख्यामा वृद्धि भइरहेको छ । आर्थिक वर्ष २०८०/८१ को चैत्रसम्म नेपाली पर्यटक आठ हजार तीन सय, सार्क राष्ट्रबाट ३५, विदेशी एक सय ८३ गरी आठ हजार पाँच सयले रारा भ्रमण गरेको तथ्यांक छ । रासस