काठमाडौं । नेकपा (एकीकृत समाजवादी)का अध्यक्ष एवं पूर्वप्रधानमन्त्री माधवकुमार नेपालले सुदूरपश्चिम प्रदेश सरकारमा सहभागी हुन नेकपा एमालेसँग आग्रह गरेका छन् । 

बिहीबार पार्टी केन्द्रीय कार्यालय आलोनगरमा भएको पत्रकार सम्मेलनका क्रममा सञ्चारकर्मीहरूले उठाएको प्रश्नको जवाफ दिँदै उनले सुदूरपश्चिम प्रदेशका मुख्यमन्त्री दीर्घ सोडारीलाई विश्वासको मत दिन र सरकारमा सहभागी हुन आग्रह गरेका हुन् । बिहीबार सुदूरपश्चिम प्रदेशमा मुख्यमन्त्रीसोडारीले विश्वासको मत लिँदैछन् । 

अध्यक्ष नेपालले मुख्यमन्त्री सोडारीलाई विश्वासको मत दिएर सरकारलाई अघि बढाउने मात्रै नभई मन्त्रीमण्डलमा सहभागी भएर सहकार्य गर्न आह्वान गरे ।  

“यो सत्ता समीकरणमा हाम्रो पार्टी पनि सामेल छ । केन्द्रीय सरकारमा पनि छ र प्रदेश सरकारमा पनि छ । आजमात्रै पनि सुदूरपश्चिम प्रदेशको मुख्यमन्त्री हुनुहुन्छ, उहाँले विश्वासको मत प्राप्त गर्नुपर्ने कार्यसूची छ । सबै सम्बन्धित पार्टीबाट सहयोग प्राप्त गर्नेछाैँ भन्ने लागेको छ । विश्वासको मत दिएर सरकारलाई अघि बढाउने मात्रै होइन, मन्त्रीमण्डलमा सहभागी भएर सहकार्य गर्नका लागि आह्वान गर्न चाहन्छौँ,” अध्यक्ष नेपालले भने ।

कोसी प्रदेशमा आफ्नो पार्टीले विश्वासको मत दिएको बताउँदै उनले मधेस प्रदेशमा जनता समाजवादी पार्टी, नेपाललाई सहयोग गरिरहेको बताए ।  उनले मुलुक सञ्चालनको क्रममा सरकार सम्पूर्ण रूपमा जनताप्रति बफादार भएर जनसेवाको काममा जुटेर विकास निर्माणको काममा लाग्नुपर्ने बताए । 

‘कोसी प्रदेशमा विश्वासको मत हामीसँग कुरा भएर नयाँ सरकार बनेको होइन, परामर्श हामीसँग भएको भए राम्रो हुन्थ्यो । हामीले विश्वासको मत दिएका छौँ, चलिरहेको छ । मधेस प्रदेशमा जनतास माजवादी पार्टी, नेपालसँग सहकार्य रही रहेकाले त्यसलाई ध्यानमा राखेर मधेस सरकारमा संलग्नता कायम राख्दै अघि बढिरहेका छौँ । पार्टीहरूको बीचमा एकता होस्, सहकार्य होस् भन्ने चाहना छ । मुलुक सञ्चालनको क्रममा सरकार सम्पूर्ण रुपमा जनताप्रति बफादार भएर जनसेवाको काममा जुटेर विकास निर्माणको काममा लागोस् । यो सरकारको भलो चाहन्छौँ,” अध्यक्ष नेपालले भने ।