किभिभ । अमेरिकाका विदेशमन्त्री एन्टोनी ब्लिकेन ‘सरप्राइज’ भ्रमणका क्रममा आज एक्कासि युक्रेनको राजधानी किभिभ पुगेका छन् । रुसले युक्रेनको दोस्रो ठूलो सहर खार्किभमा आक्रमण तीब्र पारेका बेलामा ब्लिंकेन अचानक युक्रेन पुगेका हुन् ।

उनी स्लिपर रेल चढेर आज बिहान राजधानी युक्रेनको सीमा क्षेत्र पोल्यान्डबाट त्यसतर्फ गएका हुन् । उनले त्यहाँ युक्रेनका राष्ट्रपति भोलोदिमिर जेलेन्स्कीसँग समेत भेट्ने अपेक्षा गरेका छन् । अमेरिकी कंग्रेसले युक्रेनको राहत प्याकेज स्वीकृत गरेको तीन साताकै बीचमा उच्च स्तरीय अमेरिकी कुटनीतिज्ञ किभिभ पुगेका हुन् ।

उनी ९ घण्टा रेल चढेर त्यहाँ पुगेका हुन् । त्यसभन्दा अघि उनी सीमा क्षेत्रमा रहेको पोलिस सहर रेजेस्जोमा रहेको विमानस्थलसम्म आएका थिए । सो विमानस्थलबाट नै वैदेशिक सहयोग र हातहतियार युक्रेन भित्रिने गरेको छ ।

अमेरिकी विदेशमन्त्री युक्रेन जानुअघि बेलायतको विपक्षी दल लेबर पार्टीका तर्फबाट छाया विदेशमन्त्री डेभिड लाम्मी र छाया रक्षामन्त्री जोहन हेलेपनि सोमबार किभिभ पुगेका थिए । उनीहरूले हिजैबाट त्यहाँ भेटघाट थालेका छन् । रुस र युक्रेनबीचको युद्ध अहिले आक्रामक हिसाबले अघि बढिरहेको बेलामा अमेरिका र बेलायतका अधिकारीहरूले किभिभमा उपस्थिति देखाएर समथर्नलाई अझ बलियो बनाउने प्रयास गरेका छन् । अमेरिकाले पठाएका हतियार अहिले युक्रेनको सेनाको फ्रन्टलाइनमा पुगेको जनाइएको छ । बीबीसी