काठमाडौं । ललितपुर मेयर महिला च्याम्पियनसिपमा सुदूरपश्चिम प्रदेशले लगातार दोस्रो जित निकालेको छ । 

सोमबार कीर्तिपुरस्थित त्रिवि क्रिकेट मैदानमा भएको खेलमा सुदूरपश्चिमले कोसी प्रदेशविरुद्ध १९ रनको जित निकालेको हो । दिनको दोस्रो खेलमा सुदूरपश्चिम प्रदेशले प्रस्तुत गरेको ११३ रनको लक्ष्य पछ्याउने क्रममा कोसीले निर्धारित २० ओभर नै ब्याटिङ गरे पनि सात विकेट गुमाएर ९३ रनमात्र बनाउन सक्यो ।

कोसीकी काजल श्रेष्ठले ३३ रन बनाए पनि टिमको हार टार्न भने सकिनन् । कप्तान अप्सरी बेगमले २३ रन थपिन् । यसबाहेक, अन्यले दोहोरो अंकमा रन जोड्न सकेनने ।

सुदूरपश्चिमकी रितु कनौजिया, लक्ष्मी साउद, जानकी थापा र विन्दु रावलले समान एक विकेट लिए ।

त्यसअघि टस जितेर ब्याटिङमा आएको सुदूरपश्चिमले निर्धारित २० ओभरमा आठ विकेट गुमाउर ११२ रनको योगफल खडा गरेको थियो । 

सुदूरपश्चिमकी सम्झना खड्काले ५४ रनको अर्धशतकीय इनिङ खेलिन् । रितु कनौजियाले २३ रन थप्दा कप्तान विन्दु रावलले १४ रन बनाइन् । कोसीकी सबनम राई, हिरन्मयी रोय र संगिता राईले समान दुई विकेट लिए । यस्तै, अलिसा खडियाले एक विकेट हात पारिन् ।

प्रतियोगितामा लगातार दोस्रो जित निकालेको सुदूरपश्चिम चार अंकसहित तालिकाको दोस्रो स्थानमा छ । समान खेल खेलेको कोसीले भने अझै खाता खोल्न सकेको छैन । यसअघि आजै भएको पहिलो खेलमा विभागीय टोली एपीएफले वाग्मती प्रदेशविरुद्ध आठ विकेटको सहज जित निकालेको थियो ।