काठमाडौं । चितवनको कार्यक्रममा गएका प्रधानमन्त्री पुष्पकमल दाहाल ‘प्रचण्ड’ फर्किएपछि सत्ता गठबन्धनको बैठक बस्ने तयारी गरेको छ । प्रधानमन्त्रीको सचिवालयले दिएको जानकारीअनुसार प्रधानमन्त्री आइसकेपछि बैठक बस्ने तयारी भएको हो । 

बैठकमा विशेषगरी प्रमुख प्रतिपक्ष दलले माग गरेको संसदीय छानबिन समिति गठनको विषयमा छलफल हुने सचिवालयले जनाएको छ । कांग्रेसले समिति नबने भोलि सदनमा सरकारको नीति तथा कार्यक्रम प्रस्तुत गर्न नदिने निर्णय नै गरिसकेको छ ।  

चितवनमा आयोजित कार्यक्रममा प्रधानमन्त्री प्रचण्डले सदनको गतिरोध अन्त्य गर्न दलहरूबीच आज सघन छलफल हुने बताएका छन् । “उहाँ ३ बजे आउने कुरा थियो । तर, अझै उतै हुनुहुन्छ । उहाँ आएपछि साँझ बैठक बस्ने कुरा छ,” एक सदस्यले भने । 

सहकारीको बचत अपचलन र ठगी प्रकरणमा गृहमन्त्री समेत रहेका रास्वपा सभापति रवि लामिछानेको संलग्नता रहेको भन्दै संसदीय छानबिन समितिको माग भएको हो । पोखरा, बुटवललगायतबाट प्राप्त प्रतिवेदनहरूले समितिको औचित्य र आवश्यकता पुष्टि भएको भन्दै कांग्रेसले जुनसुकै हालतमा समिति बनाउनुपर्ने माग गरिरहेको छ । उसले सदन बैठक चल्न दिएको छैन । 

हिजो (आइतबार)मात्र कांग्रेस नेताहरूले प्रधानमन्त्री प्रचण्डलाई बालुवाटार पुगेर भेट र छलफल गरेका थिए । प्रधानमन्त्रीले अन्य दलसँग संवाद गरेपछि आफू निर्णयमा पुग्ने प्रतिबद्धता जनाएका थिए । कांग्रेसले पनि समिति नबने सदन मात्र होइन नीति तथा कार्यक्रम नै प्रस्तुत गर्न नदिने चेतावनी दिइसकेको छ ।