काठमाडाैं । नेकपा (एमाले)का अध्यक्ष केपी शर्मा ओलीले आजको सदनमा नेपाली कांग्रेसले के गर्छ भन्ने हेरिने बताएका छन् । शुक्रबार बसेकाे पार्टीकाे संसदीय दलको बैठकमा उनले अघिल्लो बैठकमा कांग्रेस रन्थनिएको बताए । 

“आज नेपाली कांग्रेसले के गर्छ, हेर्नुपर्नेछ । योभन्दा अघिल्लो अधिवेशन नेपाली कांग्रेस अत्यन्तै रन्थनियो ।  के गर्ने नगर्ने । प्रधानमन्त्री भइदिऊ भनेर यहाँ पनि पुगेको छ, उहाँ पनि पुगेको छ,” ओलीले भने । 

उनले सदनमा प्रश्न उठेपछि गृहमन्त्री रवि लामिछानेले जवाफ दिन्छु भन्दा बोल्न नदिएको बताए । “सदनमा प्रश्न उठेपछि, नेपाली कांग्रेस जतिको पार्टीले प्रश्न उठाएपछि म सदनमा बोल्छु भन्नुभयो । कांग्रेसले बोल्न दिएन । आरोप लगाउने बोल्न नदिने,” उनले भने । 

ओलीले बोल्न नदिएर जग हसाइ गरेको बताए । उनले प्रमुख पार्टीको छलफलमा आफूले प्रश्न उठाएर जवाफ दिन नपाउने भन्ने नमिल्ने बताएको सुनाए ।