site stats
बाह्रखरी :: Baahrakhari
राजनीति
Global Ime bankGlobal Ime bank
थाइल्यान्डका लगानीकर्तालाई नेपालमा लगानी गर्न आह्वान

काठमाडौं । प्रधानमन्त्री केपी शर्मा ओलीले आफ्नो औपचारिक भ्रमणबाट नेपाल र थाइल्यान्डबीचको आपसी सम्बन्ध नयाँ उचाइमा पुगेको दाबी गरेका छन् । 

थाइल्यान्डको औपचारिक भ्रमणका क्रममा बैंककमा रहेका प्रधानमन्त्री ओलीले थाइल्यान्डका प्रधानमन्त्री पे थोङ् थान् शिनावातसँगको द्विपक्षीय भेटवार्तापछि आयोजित संयुक्त पत्रकार सम्मेलनमा बोल्दै उक्त दाबी गरेका हुन् । 

पत्रकार सम्मेलनमा प्रधानमन्त्री ओलीले आफ्नो भ्रमणबाट दुई मुलुकबीच संस्कृति, पर्यटन, शिक्षा, ऊर्जालगायत क्षेत्रमा सहकार्य अभिवृद्धि हुने विश्वास व्यक्त गरेका थिए ।

उनले नेपाल र थाइल्यान्डबीच ६५ वर्षदेखि रहेको कूटनीतिक सम्बन्ध र जनता–जनताबीचको सम्बन्धलाई अझ विस्तार गर्ने विषयमा आफूहरूबीच छलफल भएको बताए ।

प्रधानमन्त्री ओलीले नेपालमा होटेल व्यवसाय तथा हवाई सेवाजस्ता पर्यटन क्षेत्रमा थाइल्यान्डको लगानी र व्यापारका विषयले आगामी दिनमा प्राथमिकता पाउने विश्वास व्यक्त गरे ।

“नेपाल र थाइल्यान्डबीच कृषि, व्यापार, पर्यटन, संस्कृतिको गहिरो सम्बन्ध कायम रहेको छ । थाइल्यान्डका लगानीकर्तालाई नेपालमा लगानीका लागि म आह्वान गर्दछु,” प्रधानमन्त्री ओलीले भने, “नेपाल र थाइल्यान्डबीचमा व्यापार र पर्यटनको सम्बन्ध राम्रो रहेको छ । अब हामी अन्तर्राष्ट्रिय मुद्दाका साथै जलवायु परिवर्तनका बारेमा हातेमालो गरेर काम गर्नेछौँ ।”

प्रधानमन्त्री ओलीले थाइल्यान्डका प्रधानमन्त्री शिनावातलाई नेपाल भ्रमणको निमन्त्रणा दिएको जानकारी दिँदै उनीबाट छिट्टै नेपालको भ्रमण हुने विश्वास पनि व्यक्त गरेका थिए ।

थाइल्यान्डको पाँचदिने औपचारिक भ्रमणको सिलसिलामा प्रधानमन्त्री ओली मंगलबार त्यसतर्फ प्रस्थान गरेका थिए ।

प्रधानमन्त्री ओली र थाइल्यान्डका समकक्षीबीच बुधबार द्विपक्षीय वार्ता भएको थियो । वार्ता सकिएलगत्तै नेपाल र थाइल्यान्डबीच विभिन्न आठवटा सम्झौता तथा समझदारीपत्रमा हस्ताक्षर र आदानप्रदान भएको थियो । 

त्यसपछि दुई देशका प्रधानमन्त्री संयुक्त पत्रकार सम्मेलनमा सहभागी भएका थिए ।

प्रकाशित मिति: बुधबार, चैत २०, २०८१  १४:०७
worldlinkworldlink
प्रतिक्रिया दिनुहोस्
MPG Admark South Asian UniversityMPG Admark South Asian University
Nepal Life Insurance banner adNepal Life Insurance banner ad
Ncell Side Bar LatestNcell Side Bar Latest
Bhatbhateni IslandBhatbhateni Island
सम्पादकीय
Hamro patroHamro patro