काठमाडौं । युवा तथा खेलकुदमन्त्री विराजभक्त श्रेष्ठले त्रिपुरेश्वरस्थित दशरथ रंगशालाको निरीक्षण गरेका छन् । दशरथ रंगशालाले अन्तर्राष्ट्रिय मापदण्ड गुमाउने भएपछि उनले मंगलबार त्यसको निरीक्षण गरेका हुन् ।

त्यसक्रममा मन्त्री श्रेष्ठले अखिल नेपाल फुटबल संघ (एन्फा)का अध्यक्ष पंकजविक्रम नेम्वाङसँग के कारणले दशरथ रंगशालाले अन्तर्राष्ट्रिय मापदण्ड गुमाएको भन्दै प्रश्न गरे ।

राष्ट्रिय खेलकुद परिषद् (राखेप)का सदस्यसचिव टंकलाल घिसिङले पनि रंगशालाको आवश्यक मापदण्डबारे आफूहरूलाई एन्फाले जानकारी नगराएको उल्लेख गरे ।

सरकार या खेलकुदको प्रशासकीय निकाय राखेप र प्रतिनिधिमण्डलबीच एन्फाले छलफल नगराएको पनि राखेपले आरोप लगाएको छ ।

दशरथ रंगशाला नेपालको एक मात्र अन्तर्राष्ट्रिय रंगशाला हो । तर, एएफसी प्रतिनिधिले केही समयअगाडि दशरथ रंगशालाको निरीक्षण गर्दै त्यहाँ अन्तर्राष्ट्रिय प्रतियोगिता हुन अयोग्य रहेको रिपोर्ट प्रस्तुत गरेका थिए ।

केही दिनअगाडि मात्र एएफसीले एन्फालाई अन्तर्राष्ट्रिय प्रतियोगिता गर्न दशरथ रंगशाला अयोग्य रहेको पत्रचार गरेको थियो । त्यससँगै विश्वकप छनोट चरणमा बहराइनसँगको घरेलु मैदानमा खेल गुमाएको नेपालले संयुक्त अरब इमिरेट्स (यूएई)सँग पनि ‘होम म्याच’ गुमाउने भय बढेको छ ।

मन्त्री श्रेष्ठले एन्फा र राखेपबीच समन्वयको अभाव देखिएको र फ्लट लाइटमा केही समस्या रहेको उल्लेख गरे । यी पक्ष सुधार गर्दै पाँच दिनभित्र रिपोर्ट बुझाउन सम्बन्धित पक्षलाई निर्देशन दिइएको उनले बताए । न्युज एजेन्सी नेपाल