भक्तपुर । चाँगुनारायण नगरपालिका‐२, दुवाकोटमा सन्तोषमान श्रेष्ठले सञ्चालन गरेको ज्योति प्लाइ कार्पेट कारखानामा आज आगलागी भएको छ । आगलागी नियन्त्रणका क्रममा दुईजना घाइते भएका छन् । 

आगलागी भएको जानकारी पाएपछि दुवाकोटस्थित नेपाल प्रहरी, सशस्त्र प्रहरी बलका साथै भक्तपुर, काठमाडौं, ललितपुर र काभ्रेपलाञ्चोकबाट आएको सात वटा दमकल, भक्तपुर, ललितपुरबाट आएका चार वटा पानी ट्यांकर र स्थानीयको सहयोगमा पाँच घण्टा लगाएर आगो नियन्त्रण गरिएको जिल्ला प्रहरी परिसर भक्तपुरका प्रहरी नायब उपरीक्षक राजन कार्कीले जानकारी दिए । 

उनका अनुसार आगो निभाउने क्रममा घाइते भएका रामेछापको लिखु तामाकोसी गाउँपालिका–६ घर भई हाल दुवाकोट बस्ने २३ वर्षीय बुद्धनारायण श्रेष्ठको इवामुरा अस्पतालमा उपचार भइरहेको छ । त्यस्तै, गम्भीर घाइते भएका भारतको बंगाल घर भई हाल दुवाकोट बस्ने २९ वर्षीय मनु उर्वाको कीर्तिपुर अस्पतालमा उपचार भइरहेको छ । इवामुरा अस्पतालमा सामान्य उपचारपछि थप उपचारका लागि कीर्तिपुर लगिएको उनले जानकारी दिए । 

आगलागीको कारण खुलेको छैन । आगलागीबाट एक करोड ८० लाख बराबरको क्षति भएको प्रनाउ कार्कीले जानकारी दिए । रासस