इलाम । "निश्चय नै यस उपनिर्वाचनले हाम्रो 'मिसन–८४'लाई सन्देश चाहिँ दिन्छ," उपनिर्वाचनअघि दमकमा बाह्रखरीसँगको संवादमा राष्ट्रिय स्वतन्त्र पार्टी (रास्वपा)का उमेदवार मिलन लिम्बूले भनेका थिए ।

सुरुमा स्वतन्त्र उमेदवारी दिने बताएर उनी प्रचारमा जुटिसकेका थिए । तर, पछि रास्वपाबाट उमेदवार बने । उपनिर्वाचनबाट सांसदको सपना देखेर रास्वपाबाट चुनाव लडेका उनी यसपटक नजित्ने लगभग निश्चित भइसकेको छ ।

उपनिर्वाचनका लागि रास्वपाले उमेदवार छान्न र पूर्वमा संगठन विस्तार गर्न राम्रै संघर्ष गर्‍यो । सहमहामन्त्री कविन्द्र बुर्लाकोटी सुरुदेखि नै इलाममै बसे । उमेदवार छान्न नेताहरू ४२ वडामै पुगे । नेताहरू मनिष झा, सोविता गौतम, निशा डाँगीसहिका नेताहरू उमेदवार खोज्न गाउँ पसे । उपसभापतिद्वय स्वर्णिम वाग्ले, डीपी अर्याल, संसदीय दल उपनेता विराजभक्त श्रेष्ठ, प्रमुख सचेतक सन्तोष परियारसहितले निरन्तर इलामलाई केन्द्रमा राखेर काम गरे । चुनावमा पनि गृहमन्त्रीसमेत रहेका पार्टी सभापति रवि लामिछाने र शिक्षामन्त्री सुमन श्रेष्ठले घरघर पुगेर मत मागे ।

समग्रमा इलाममा रास्वपा आक्रामकरूपमा प्रस्तुत भएको थियो । तर, पनि रास्वपाको नतिजा निकै कमजोर देखियो । यतिसम्म कि लिम्बूले आफ्नै वडाबाट १०० मत पनि पाउन सकेनन् ।

सात वडा रहेको फाकफोकथुम गाउँपालिकाबाट रास्वपाले ६४५ मत मात्र पायो । वडा नम्बर १ बाट ११५, वडा नम्बर २ बाट ९६, वडा नम्बर ३ बाट ९७, वडा नम्बर ४ बाट ७१, वडा नम्बर ५ बाट ५५, वडा नम्बर ६ बाट १२७ र वडा नम्बर ७ बाट लिम्बूले ८४ मात्र पाए ।

माङसेबुङ गाउँपालिकाबाट उनले २४३ मत मात्र पाए । जबकि यो उनको बसोबास र मतदान गर्ने गाउँपालिका हो । वडा नम्बर १ मा उनले ३६ मत पाए । आफ्नै वडा रहेको वडा नम्बर २ मा उनले ९६ मतमात्र पाए । लिम्बूले ३ नम्बर वडामा ४२, ४ वडा नम्बरमा ८, वडा नम्बर ५ मा ३, वडा नम्बर ६ मा ५८ मत पाए ।

रास्वपाले कुनै पनि वडामा लिड गर्न सकेन । माई नगरपालिकाका तीनवटै वडामा रास्वपाले कुल २०१ मत पायो । रास्वपाले वडा नम्बर ६ मा ८४, वडा नम्बर ७ मा ४० र वडा नम्बर ८ मा ७७ मत पायो ।

यता चुलाचुली गाउँपालिकामा पनि रास्वपाको प्रदर्शन निराशाजनक नै रह्यो । यस पालिकाबाट रास्वपाले ६२४ मतमात्र पायो ।

लिम्बूले वडा नम्बर १ मा ११५, वडा नम्बर २ मा १५४, वडा नम्बर ३ मा ८६, वडा नम्बर ४ मा ६०, वडा नम्बर ५ मा १०२ र वडा नम्बर ६ मा १०७ मत पाए । 

रास्वपाले देउमाई नगरपालिका र इलाम नगरपालिकाबाट राम्रो मत पाउने आकलन गरिएको थियो । यहाँ उनीहरूले बढी मिहेनत पनि गरेका थिए । सभापतिसहित अन्य नेता नै लागेका थिए । तर, मतबाट त्यसो देखिएन ।

लिम्बूले वडा नम्बर १ मा २३२, वडा नम्बर २ मा ११२ मत पाए । वडा  नम्बर ३ मा २५९, वडा नम्बर ४ मा ३२९ र वडा नम्बर ५ मा १५८ मत पाए । उनले वडा नम्बर ६ मा १४१, वडा नम्बर ७ मा १२३ र ८ नम्बर वडामा १७४ मत मात्र पाए ।