काठमाडौं । सशस्त्र प्रहरी बल नेपालले मनसुन सुरुआतसँगै हुनसक्ने विभिन्न विपद्का घटनाहरूको प्रतिकार्य अभ्यास गरेको छ । सशस्त्र प्रहरी बल नेपाल नम्बर–९ पशुपतिनाथ बाहिनीले कीर्तिपुर नगरपालिका–६, टौदहमा उद्धार अभ्यास गरेको हो ।

मुनसुनमा घट्न सक्ने बाढी, पहिरो, डुबान एवं विपद्का घटनाहरूमा प्रतिकार्य अभ्यासले ठूलो मद्दत पुग्ने बाहिनीका प्रमुख सशस्त्र प्रहरी नायव महानिरीक्षक (डीआईजी) पुरुषोत्तम थापाले बताए ।

स्थानीय निकाय तथा सरोकारवाला निकायहरुबीचको सहकार्यमा विपद्का घटनामा सशस्त्र प्रहरी बलले प्रभावकारी काम गर्ने डीआईजी थापाको भनाइ छ । सशस्त्र प्रहरीले बलले विभिन्न विपद्जन्य घटनाहरू आगलागी, सडक दुर्घटना, जल उत्पन्न प्रकोप, भूकम्पजस्ता विपद्जन्य घटनाहरूमा खोज तथा उद्दार कार्य गर्दै आएको छ ।

आइतबार टौदहमा बाढी र पहिरो र डुवानमा परेकाको उद्धार गर्नेबारे अभ्यास गरेको हो । अभ्यास कार्यक्रममा  सशस्त्र प्रधान कार्यालय कार्य विभागका प्रमुख (एआईजी) सशस्त्र प्रहरी अतिरिक्त महानिरीक्षक बंशीराज दाहालको विशेष उपस्थिति थियो ।

दाहालले अभ्यास कार्यले वास्तविक उद्धारमा सशस्त्रको उद्धार टोलीलाई चुस्त काम गर्न सहज हुने बताए । अभ्यास कार्यमा मूख्यतः गोताखोर तालिम गरेका दक्ष जनशक्तिले गहिराईमा डुबेका पीडितहरूको उद्धार गर्ने कला प्रदर्शन गरेका थिए ।

सशस्त्र प्रहरी बलले भदौ, आश्विन र कात्तिकमा सडक दुर्घटना, महामारी, चट्याङसम्बन्धी, मंसिर, पुस र माघमा लु तथा डिहाईड्रेसन, शीतलहर तथा जाडोसम्बन्धी, फागुन र चैतमा आगलागी, हावाहुरी तथा आँधीबेरी तथा वैशाख, जेठ र असारमा जल उत्पन्न प्रकोप र बाढी पहिरोसम्बन्धी विपद् सचेतनामुलक कार्यक्रमहरु सञ्चालन गर्दै आएको छ ।

पछिल्लो समय सशस्त्र नम्बर–९ पशुपतिनाथ बाहिनीले उपत्यकाका विभिन्न कलेज, स्कुल, होटल तथा स्थानीय निकायहरूसँग आवश्यक समन्वय गरी विपद्सम्बन्धी सचेतनामुलक कक्षाहरूसमेत सञ्चालन गरेको थियो ।