काठमाडौं । राष्ट्रिय खेलकुद परिषद्का सदस्यसचिव टंकलाल घिसिङले राष्ट्रिय खेल संघले विभिन्न जिल्लामा गठन गरेका जिल्ला संघका गतिविधिको पनि अनुगमन गर्ने बताएका छन् ।
भारतको केरलामा भएको प्रथम दक्षिण एसियाली कुरास प्रतियोगिताका पदक विजेतालाई बधाई दिन आयोजित कार्यक्रममा सदस्य–सचिव घिसिङले कार्यसमितिले कार्ययोजना कार्यान्वयनबारे अनुगमन हुनुपर्ने बताए ।
“अब राष्ट्रिय खेल संघहरूको मात्र हैन, राष्ट्रिय खेल संघले विभिन्न जिल्लामा गठन गरेका जिल्ला संघको पनि अनुगमन हुन्छ,” सदस्यसचिव घिसिङले भने, “कार्यसमिति बन्नु मात्र ठूलो कुरा होइन । कार्यसमितिले कस्तो कार्ययोजना ल्याउँछ र त्यसलाई कति कार्यन्वयन गर्छ, त्यो हेर्न जरुरी छ । सम्बन्धित जिल्लामा कति खेलाडी छन्, कति प्रशिक्षक छन्, प्रशिक्षण भइरहेको छ कि छैन । के के गतिविधिहरू भइरहेका छन् । सबै कुराको अनुगमन हुन्छ ।”
वैशाख ७ देखि ८ गतेसम्म भएको प्रतियोगितामा दुई स्वर्ण र तीन रजत गरी पाँच पदक जित्दै नेपाल दोस्रो भएको थियो । दिक्षा मगर र योगेन्द्र विष्टले स्वर्ण पदक जितेका थिए । परि घर्ती मगर, अर्जुन क्षेत्री र दीपिका अछाजुले रजत पदक प्राप्त गरेका थिए । दिक्षा जुनियरतर्फ उत्कृष्ट खेलाडी घोषित भएकी थिइन् । प्रतियोगितामा नेपालसहित आयोजक भारत, बंगलादेश, माल्दिभ्स र श्रीलंका पाँच राष्ट्र सहभागी थिए ।