काठमाडौं । रामबाबु गुरुङ निर्देशित नेपाली कथानक चलचित्र ‘डिग्री माइला’ले एक हप्तामा पाँच करोड ५ लाख रुपैयाँ ग्रसकलेक्सन गरेको छ । दुई दिनमा तीन करोड ६ लाख रुपैयाँ ग्रसकलेक्सन गरेको सिनेमाले एक हप्तामा पाँच करोड ५ लाख कलेक्सन गरेको हो ।
काठमाडौं उपत्यकाभित्र दुई करोड ५० लाख र काठमाडौं बाहिर दुई करोड ५५ लाख रुपैयाँ कलेक्सन गरेको निर्माणपक्षले जनाएको छ ।
टिजर र ट्रेलर दुवैले राम्रो प्रतिक्रिया पाएपछि सिनेमाले राम्रो हाइप बनाए पनि अर्ड अफ माउथ राम्रो नहुँदा अपेक्षित कलेक्सन नगरेको हो । वितरकले दुई दिनमा पाँच करोडको हाराहारी कलेक्सन गर्ने दाबी गरेको थियो ।
दयाहाङ राई र आँचल शर्मा मुख्य भूमिकामा रहेको सिनेमामा बुद्धि तामाङ, विजय बराल, प्रकाश घिमिरे, कमलमणि नेपाल, अनिल सुब्बा, माओत्से गुरुङलगायत कलाकारको अभिनय छ ।
निर्देशक गुरुङकै लेखन रहेको चलचित्रले ‘किन चाउरिस मरिच आफ्नै रागले’ भन्ने चर्चित नेपाली उखानलाई आफ्नो ट्यागलाइन बनाएको छ ।
