काठमाडौं । राष्ट्रियसभाका अध्यक्ष नारायणप्रसाद दाहालले आफ्नै बलबुताको भरमा अघि बढ्दै आएको बताएका छन् । प्रधानमन्त्री पुष्पकमल दाहाल ‘प्रचण्ड’का कारण आफूले राष्ट्रियसभाको अध्यक्षको जिम्मेवारी पाएको टिप्पणीलाई लिएर उनले अहिलेसम्म सबै आफ्नै बलबुताले गरेको दाबी गरेका हुन् ।
मंगलबार सिंहदरबारमा सञ्चारकर्मीसँगको अन्तरर्क्रिया कार्यक्रममा अध्यक्ष दाहालले प्रधानमन्त्री प्रचण्ड र आफूले २०२७ सालमा एकैदिन अनेरास्ववियुको सदस्यता लिएर राजनीति सुरू गरेको बताए । प्रधानमन्त्री प्रचण्डलाई आफूले कुनै पनि राजनीतिक गतिविधिमा नछाडेको भए पनि उनको निगाहमा आफूलाई राष्ट्रियसभा अध्यक्ष नबनाएको दाहालको दाबी छ । तर, प्रधानमन्त्री प्रचण्डको निगाहमा आफूलाई अध्यक्ष बनाइएको टिप्पणीले भने वाक्क भएको उनको गुनासो छ ।
“म त्यो विषयमा धेरै बोल्ने मनस्थितिमा छैन । २०२७ सालमा एकै दिन अनेरास्ववियुको सदस्यता लिएर राजनीति सुुरू गरेको प्रधानमन्त्री र म । मैले अहिलेसम्म जे जति गरेको छु, आफ्नै बलबुताले गरेको छु । अब पार्टीको नेता उहाँ हो । उहाँले स्वीकृत नगरी म मात्रै होइन, कसैले पनि कुनै जिम्मेवारी पाउँदैन । मैले राम्रो कति गर्छु त्यो मेरो खुबीको कुरा भयो । तर, नराम्रोचाहिँ गर्दिनँ भनेर प्रतिवद्धता व्यक्त गर्दछु,” उनले भने ।
प्रधानमन्त्री समेत रहेका माओवादी केन्द्रका अध्यक्ष प्रचण्ड र राष्ट्रियसभा अध्यक्ष दाहाल दाजुभाइ हुन् ।
