काठमाडौं । बिस्केट जात्राको प्रमुख मानिने ५५ हाते योसिंः द्यो अर्थात् लिंगो ढालिएको छ । तान्त्रिक विधिअनुरूप पूजाअर्चना गरी शनिबार साँझ लिंगो ढालिएको हो ।

तान्त्रिक विधिपूर्वक दशकर्म विधान गरी लिंगो ढालियो । लिंगोको कोखा (टुप्पो)मा नाग र नागिनीको प्रतीकस्वरूप दुई ध्वजा बाँधेर अष्टमात्रिकाका प्रतीक आठ डोरीले तानेर लिंगो ठड्याउने प्रचलन छ । त्यही आठ डोरी आठ कुनामा राखेर लिंगो ढालिएको हो ।

लिंगो उभ्याइने र ढाल्ने नै बिस्केटको प्रमुख जात्रा हो । मल्ल राजाहरूले भैरवनाथ र भद्रकालीको रथजात्रा समावेश गरी तान्त्रिक पूजा विधिविधान समेत थप गरी आठ रात नौ दिनसम्म जात्रा मनाउने प्रचलन थालिएको बताइन्छ ।

लिंगो ढालिएपछि ल्यासिंखेलबाट भैरवनाथको रथ गःहिटीमा ल्याएर भैरवनाथ र भद्रकालीको रथ जुधाइएको छ । हिमालयन टेली भ्वाइस