काठमाडौं । चलचित्र ‘डिग्री माइला’को अग्रिम बुकिङ खुला भएको छ । चलचित्रलाई सिनेमा घरहरूले उच्च संख्यामा शो दिएका छन् । 

रामबाबु गुरुङ निर्देशित सिनेमाले उच्च संख्यामा शो पाएको छ । देशकै ठूलो मल्टिप्लेक्स चेन क्यूएफएक्सले काठमाडौंमा मात्रै २४ शो उपलब्ध गराएको छ । देशभर क्यूएफएक्सले ६० शो दिएको छ । काठमाडौं बाहिर यो सिनेमालाई क्यूएफएक्सले ३६ शो पाएको छ । 

दयाहाङ राई र आँचल शर्मा मुख्य भूमिकामा रहेको चलचित्र ‘डिग्री माइला’ले क्यूएफएक्सबाहेक देशभर ९७ शो पाएको छ । 

चलचित्रमा दयाहाङ र आँचलसँगै विजय बराल, बुद्धि तामाङ, कमलमणि नेपाल, अनिल सुब्बा, माओत्से गुरुङलगायत कलाकारको अभिनय छ । 

बाँसुरी फिल्मस्ले कबड्डी फिल्मस् तथा सुस्मा फिल्मस्सँग मिलेर निर्माण गरेको सिनेमाका निर्माताहरू विशाल गुरुङ, मणिराम पोखरेल, मधु मिजार तथा सुष्मा गुरुङ रहेका छन् ।

सिनेमाका कार्यकारी निर्माता क्रिश लामा हुन् । सिनेमामा निमेष श्रेष्ठको सम्पादन तथा रोहित शाक्यको ब्याकग्राउन्ड म्युजिक रहेको छ । यस्तै सिनेमालाई दुई क्यामराम्यान शिवराम श्रेष्ठ तथा राइली एस शिनले खिचेका छन् ।