काठमाडौं । पाकिस्तानका पूर्वप्रधानमन्त्री युसुफ रजा गिलानी संसद्को माथिल्लो सदन सिनेटको अध्यक्षमा निर्वाचित भएका छन् । निर्वाचनको नतिजा अध्यक्षीय अधिकारी सिनेटर इशाक दारले घोषणा गरेका हुन् ।

देशका विदेशमन्त्री समेत रहेका दारले निर्वाचनमा अरू कसैले उमेदवारी दर्ता नगराएपछि गिलानी निर्विरोध निर्वाचित भएको घोषणा गरेका थिए । पाकिस्तान पिपुल्स पार्टीका सांसद गिलानी सन् २००८ देखि २०१२ सम्म देशको प्रधानमन्त्री बनेका थिए ।

सत्तारूढ पाकिस्तान मुस्लिम लिग–नवाजका सय्यदल खान नासिर पनि सदनको उपाध्यक्षमा निर्विरोध निर्वाचित भए ।

अध्यक्षको शपथग्रहण गरेपछि गिलानीले सिनेटले राष्ट्रको विविधता र शक्तिको प्रतिनिधित्व गरेको बताए । गिलानीले देशको प्रगतिका निम्ति संसदीय मापदण्डभित्र रहेर सक्रिय भूमिका निर्वाह गर्ने उल्लेख गरे । सिन्ह्वा/न्युज एजेन्सी नेपाल