काठमाडौं । विवेक सन्तोषीको दुई गोलप्रेरित आरसी ३२ स्पोर्ट्स क्लबले सहिद स्मारक ‘सी’ डिभिजन लिगमा वाग्मती क्लबविरुद्ध ३–० को सहज जित निकालेको छ ।

बुधबार सातदोबाटोस्थित एन्फा मुख्यालयमा सम्पन्न खेलमा आरसीलाई जित दिलाउन विवेक सन्तोषीले दुई र बबिन बोहराले एक गोल थपे । 

खेलको १०औँ मिनेटमा बबिनको गोलमा आरसीले अग्रता बनाएको थियो । २८औँ मिनेटमा विवेकले गोल गरेपछि पहिलो हाफमा आरसीले २–० को अग्रता बनाएको थियो । दोस्रो हाफमा विवेकले दोस्रो गोल गरेपछि आरसीले ३–० सहज जित निकालेको हो । 

जितसँगै दुई खेलबाट ६ अंक जोडेको आरसी तालिकाको शीर्ष स्थानमा उक्लिएको छ । समान खेलबाट तीन अंक जोडेको वाग्मती तालिकाको पाँचौँ स्थानमा छ । 

आरसीले यसअघि पहिलो खेलमा खालीबारी युथ क्लबविरुद्ध १–० को जित जित निकालेको थियो । यस्तै, वाग्मतीले भने सानेपाविरुद्ध ३–१ को जित निकालेको थियो ।