काठमाडौं । नेकपा एमालेका प्रमुख सचेतक महेश बर्तौलाले संसद्का स्थापित मान्यतालाई धज्जी उडाउँदै कांग्रेसले संसद् अवरुद्ध गरेको आरोप लगाएका छन् । बुधबार संसद् भवन सिंहदरबारमा सञ्चारकर्मीसँग कुरा गर्दै बर्तौलाले सदनमा विधेयकहरूलाई अघि बढ्न नदिएर कांग्रेसले अलोकतान्त्रिक काम गरेको बताए ।
उनले आन्दोलनको स्वरुप फेरेर सदनलाई सहज रुपमा चल्ने वातावरण बनाउन आग्रह गरे । बर्तौलाले कांग्रेस सरकारमा हुँदा नै सहकारी प्रकरणका कुरा उठेको र त्यस बेला पनि कांग्रेसले बदनियत राखेर अनुसन्धान नगरेको आरोप लगाए ।
सरकारबाट हट्नेबितिकै प्रतिशोध साध्न कांग्रेसले सहकारी प्रकरणमा छानबिन समितिको माग राखेको भन्दै उनले यसको कुनै अर्थ नरहेको जिकिर गरे । उनले सहकारीपीडितलाई न्याय दिनुपर्नेमा एमालेको स्पष्ट धारणा रहेको भन्दै नीतिनियम कानुन बनाएर यसको समाधान खोज्नुपर्ने बताए ।
