काठमाडौं । पश्चिमा मुलुकहरूको सैन्य गठबन्धन नेटोका प्रमुखले आफूहरूलाई खतरा बढेको बताएका छन् ।
उत्तर एटलान्टिक सन्धि संगठन (नेटो)का महासचिव जेन्स स्टोल्टनबर्गले रुस, चीन, इरान र उत्तर कोरिया पश्चिमाका लागि बढ्दो खतराको प्रतिनिधित्व गर्दै एक हुँदै गएको बताएका छन् ।
बीबीसीसँगको एक अन्तर्वार्तामा आइतबार स्टोल्टनबर्गले भनेका छन्, “चीनले रक्षा उद्योगका सामग्री उपलब्ध गराएर रुसको युद्धावस्थाको अर्थतन्त्रलाई बढवा दिइरहेको छ । त्यसको बदलामा मस्कोले बेइजिङमा आफ्नो भविष्य धितो राखेको छ।”
रुसले इरान र उत्तर कोरियालाई गोलाबारुद र सैन्य उपकरणको सट्टामा प्रविधि उपलब्ध गराएको समेत उनको दाबी छ ।
'तानाशाही शक्तिको बलियो गठबन्धन'विरुद्ध नेटोले जापान र दक्षिण कोरियाजस्ता देशसँग गहन सहकार्य गर्न आवश्यक रहेको उनको भनाइ छ ।
आरटीबाट ।