काठमाडौं । प्रमुख प्रतिपक्ष दल नेपाली कांग्रेसका सांसद प्रदीप पौडेलले काठमाडौं उपत्यकाभित्र छरिएर रहेका सम्भावित पानीका स्रोतलाई एकीकृत गरी संकलन गर्ने सर्वेक्षणका निम्ति आग्रह गरेका छन् ।
आइतबार खानेपानी मन्त्रालयमा सांसदहरूसँग मेलम्ची खानेपानी आयोजनाको दिगो व्यवस्थापनसम्बन्धी अन्तरक्रिया कार्यक्रममा उनले आजसम्म गरिएका कामको समीक्षापछि मात्र थप लगानी गर्न आग्रह गरे । उनले शिवपुरी जलाधार क्षेत्रभित्र रहेका खानेपानीको स्रोत व्यवस्थित र स्तरोन्नति गर्दै पानीको चुहावट रोक्नुपर्नेमा जोड दिए ।
“चण्डेश्वरी, विष्णुपादुका, मुहानपोखरीलगायत स्रोतलाई व्यवस्थित तथा स्तरोन्नति गर्दै पानीको चुहावट रोक्ने तथा छरिएर रहेका अन्य खानेपानीका विभिन्न स्रोतलाई समेत एकीकृत संकलन गरी बूढानीलकण्ठ, टोखा र महानगरमा वितरण गर्न सकिन्छ,” उनले भने ।
उनले खानेपानी योजनामा लगानी खेर जाने स्थिति आउन नदिन थप अध्ययन गरेर मात्र हेडवर्क्स निर्माण गरिनुपर्ने बताए ।
एडीबीको अध्ययन र पुल्चोक इन्जिनियरिङ कलेजले रिभ्यु गरेको प्रतिवेदन कार्यक्रममा सार्वजनिक गरिएको थियो ।
