काठमाडौं । ‘बोक्सीको घर’मा केकी अधिकारीसहित उनको टिमलाई केही फरक काम गर्नु थियो । समाजमा जे छ, त्यसलाई हुबहु देखाउनु थियो । समाजको कथा भन्दै त्यसमा आफ्नो धारणा राख्नु थियो । त्यो सिनेमामा कसरी आउँछ, हेर्न बाँकी छ । तर, अहिलेसम्म आएका कन्टेनमा केही विषयले पाएको निरन्तरताले आशा देखाएको छ ।

सिनेमामा त्यस्तो प्रतिविम्व अर्थपूर्ण र बलियो हुन्छ, जसले विशेष अर्थ बोकेर सुरुदेखि अन्तिमसम्म निरन्तरता पाउँछ । कतै देखिने र हराउने विम्बको खासै अर्थ रहन्न, किनकि त्यो सुझबुझपूर्ण तरिकाले गरिएको हुँदैन ।

‘बोक्सीको घर’ निर्माणपक्षले अहिलेसम्म सार्वजनिक गरेका सिनेमाका कन्टेनमा केही विषयले निरन्तरता पाएको छ । ती हुन्, पिपलको बोट, गाढा रातो रङ र डरलाग्दो आँखा ।

‘बोक्सीको घर’को थिम पोस्टर, फर्स्टलुक, टिजर हुँदै गीतसम्म आइपुग्दा पिपलको बोटले निरन्तरता पाएको छ । बडेमाको पिपलको बोट जो आफैँका लामो समय बाँच्छ । पिपलको बोट अर्थात् चौतारो जसले समाजका सबै पक्ष देखेको हुन्छ । राम्रा र नराम्रा दुवै विषयको साक्षी हुन्छ । विश्वास र अविश्वास दुइटै पक्ष । कुरीति, कुसंस्कार र परिवर्तन सबै पक्षको साक्षी हुन्छ, चौतारो र त्यसमा रहेको पिपलको रुख ।

दिउँसो घाममा बटुवालाई शीतल छहारी दिँदै सुस्ताउने स्थान हो, पिपलको बोट । राति त्यही चौतारो र पिपलको बोट तर्साउने ठाउँ हो भन्ने कतिपयको अन्धविश्वास छ । धेरैले यसलाई अन्धविश्वास मान्छन् । केहीले त्यसमै विश्वास गर्छन् । त्यही विषयलाई यो सिनेमाको कन्टेनमा देखाउन खोजिएको छ ।

टिजर होस् वा गीत अथवा पोस्टर रातो रङ र डरलाग्दो आँखाले पनि कन्ट्युनिटी पाएको छ ।

केही दिनअघि सार्वजनिक ‘बोक्सीको घर’को ‘बुझिनँ मैले’ बोलको गीतको दृश्य पिपलको बोटबाटै सुरु हुन्छ । मध्यरातमा चोभारको पिपलको बोटको दृश्य खिचिएको थियो । पूरै दिन र रात गरेर यो खिचिएको थियो ।

“हामीलाई सिनेमाको थिम बताउने गीत चाहिएको थियो । जसमा सरल र सहज शब्द र लय चाहिएको थियो,” केकी बाह्रखरीसँग भन्छिन्, “एकातिर विषयवस्तुभित्र बाँधिएर गीत तयार पार्नुपर्ने थियो, अर्कोतिर आमनागरिकले एकपटक सुन्दै सम्झिने खालको गीत चाहिएको थियो । यही परिधिभित्र बसेर प्रकाश सपूतले गीत लेखिदिनुभयो ।”

गीतअनुसारको भिडियो चाहिएको थियो । त्यसले सिनेमाको कथा पनि बोल्नुपर्ने थियो । कोरियोग्राफी पनि भिन्न चाहिएको थियो । आँखाले धेरै कुरा बोल्नुपर्ने थियो । “दर्शकले कसरी लिइरहनुभएको छ, कस्तो मूल्यांकन गरिरहनुभएको छ, त्यो केही हदसम्म युट्युबमा आएका प्रतिक्रियाले पनि बताउँछ,” केकी भन्छिन्, “तर, हामीले चाहेजस्तै पिपलको बोटबाट केही कथा संकेत गरेका छौँ । समय र कलरमार्फत केही भन्न खोजिरहेका छौँ भन्ने लागेको छ । अनि, केही भिन्न कोरियोग्राफी र आँखाबाट धेरै कुरा भन्न सक्यौँ कि भन्ने लागेको छ । यो सुन्दर कोरियोग्राफी सुनील क्षेत्रीले गरिदिनुभयो ।”

अन्धविश्वासमा जकेडिएको समाजमा के हुन्छ, गीतका शब्दले भन्ने प्रयास गरेको छ । लबज र रूपले देखाउने प्रयास गरेको छ । विम्बले बोलेको छ । भलै, यो अन्धविश्वासलाई सिनेमाले कसरी देखाउँछ, त्यो हेर्न बाँकी नै छ । त्यसो त सुरुका दिनदेखि अहिलेसम्म आएको विम्बले ट्रेलरमै निरन्तरता पाउँछ कि पाउँदैन त्यही नै हेर्न बाँकी छ ।

महिलामाथि बोक्सीको आरोप लगाएर समाजले उनीहरूमाथि गर्ने शोषणको वरिपरि रहेर सिनेमा निर्माण गरिएको निर्माण पक्षले जनाएको छ ।