काठमाडौं । विवेकशील साझा पार्टीले सहकारी ठगी प्रकरणमा उच्चस्तरीय छानबिन आयोग गठन गर्न माग गरेको छ । सर्वसाधारणको अर्बौँ रकम अपचलन हुँदा पनि सरकार मौन रहेको पार्टीको आरोप छ ।

एक विज्ञप्ति जारी गर्दै विवेकशील साझाका प्रवक्ता आशुतोष प्रधानले बहालवाला मन्त्रीदेखि राजकीय पदमा आसीन वर्तमान एवं पूर्वपदाधिकारी समेत सो प्रकरणमा सामेल भएको आरोप लगाएका छन् ।

“विवेकशील साझा पार्टी सहकारी ठगी प्रकरणमा संलग्नहरूलाई छानबिनका लागि उच्चस्तरीय आयोग गठन गरी दोषीलाई हदैसम्मको कारबाही गर्न र पीडितलाई राहत तथा परिपूरणको व्यवस्था गर्न सरकारसँग जोडदार माग गर्दछ,” विज्ञप्तिमा उल्लेख छ ।

पीडितप्रति ‘अचाक्ली ज्यादती भएको’ विवेकशील साझाको ठहर छ । “सरकारमा संलग्न मन्त्रीहरू, पूर्वमन्त्रीहरू, विभिन्न दलका नेताहरूको मिलेमतो र सेटिङमा सर्वसाधारणको अर्बौँ रुपैयाँ अपचलन हुनु र पीडितको बिल्लीबाठ हुँदा पनि सरकारले प्रभावकारी छानबिन गरी दोषीलाई कारबाही नगर्नु जनमतको अवहेलना र पीडितप्रति अचाक्ली ज्यादती भएको विवेकशील साझा पार्टीको ठहर छ,” विज्ञप्तिमा भनिएको छ ।

सत्ताको दुरुपयोग गरिएको भन्ने पीडित र सरोकारवालाको भनाइलाई बेवास्ता गरिनु नहुनेमा विज्ञप्तिमा जोड दिइएको छ । विज्ञप्तिमा उल्लेख छ, “सरकारमै रहेका कतिपय आरोपित मन्त्रीहरूले सत्ताको दुरुपयोग गर्दै दलीय दादागिरीको जगमा छानबिनलाई नै स्याबोटेज गरिरहेको भन्ने सरोकारवाला र सहकारीपीडितहरूको भनाइलाई बेवास्ता नगर्न विवेकशील साझा पार्टी प्रधानमन्त्रीलाई विशेष ध्यानाकर्षण गर्दछ ।”