झापा । नेपाल कम्युनिस्ट पार्टी (एमाले) झापाको अध्यक्षमा प्रेम गिरी सर्वसम्मत चयन भएका छन् । पार्टीको ११औँ जिल्ला अधिवेशनबाट अध्यक्षमा गिरी सर्वसम्मत चयन भएको निर्वाचन समितिका संयोजक टंक दंगालले बिहीबार घोषणा गरेका हुन् ।

पार्टीको जिल्ला उपाध्यक्षमा शिवकुमार ढुंगेल, सचिवमा तुलसी कार्की, उपसचिवमा असारु राजवंशी, महिला उपसचिवमा अनिता कन्दङ्वा सर्वसम्मत चयन भएको संयोजक दंगालले जानकारी दिए ।

उनका अनुसार, जिल्लामा अधिवेशनबाट १४९ सदस्यीय समिति सर्वसम्मत चयन गरिएको छ ।

पार्टीका झापा इन्चार्ज तथा पोलिटब्युरो सदस्य विशाल भट्टराईका अनुसार, पदाधिकारी पाँच, १५ पालिकाबाट ११०, खुला सदस्य १५, आदिवासी जनजातिबाट पाँच, दलितबाट पाँच, अल्पसंख्यक मधेसीबाट तीन, मजदुरबाट पाँच र अपांगता भएकाबाट एक गरी १४९ जना सर्वसम्मत चयन भएका छन् ।

नयाँ समितिलाई आजै शपथग्रहण गराइएको छ । बाँकी १० प्रतिशतलाई पार्टीको पहिलो बैठकबाट मनोनीत गरिने उनले जानकारी दिए ।

एमाले अधिवेशनको उद्घाटन चैत १५ गते पार्टी अध्यक्ष केपी शर्मा ओलीले गरेका थिए । रासस